Kirkjuritið - 01.09.1950, Blaðsíða 100

252
KIRKJURITIÐ
upphafi hjá Guði og var Guð, þ. e. guðdómleg vera. Sumir at-
burðirnir séu einnig aðeins táknrænir í augum guðspjalla-
mannsins, svo sem brúðkaupsveizlan í Kana, er Jesús breytir
vatni í vín. Skýringamar veita þannig mikla hjálp til þess, að
unnt verði að samræma frásagnir Samstofna guðspjallanna Jó-
hannesarguðspjalli, enda má telja miklar líkur þess, að störf
Jesú í Júdeu, sem Jóhannesarguðspjall skýrir frá, taki að ein-
hverju leyti a. m. k. við af störfum hans í Galíleu. Hugsanir
höfundar eru leifturljósar, og öll orðamælgi fjarri honum sem
mest má vera.
Kirkjuritið mælir hið bezta með þessari bók og vill hvetja
presta til að eignast hana og kynna sér vandlega.
SAGA ÍSLENZKRA SKÁLDA.
Richard Beck:
History of lcelandic Poets 1800—1940.
Ithaca, New York 1950.
Dr. Richard Beck, prófessor við Háskóla Norður-Dakota, er
afkastamikill rithöfundur, eins og kunnugt er. Hann hefir á
síðari árum samið þenna merka þátt í íslenzkri bókmenntasögu
á enska tungu og mun þannig kynna enskumælandi þjóðum.
Er það mjög þarft og gott verk.
Kirkjuritið vill vekja athygli á þessari bók af þeirri ástæðu,
að þar er margt ritað um íslenzkan sálmakveðskap og sálma-
skáld, allt frá Jóni Þorlákssyni til Jóns Magnússonar. Er fróð-
legt að kynnast dómum höfundar og mati, sanngjömum og
hóflegum. Hann telur séra Matthías konung sálmaskáldanna og
birtir þýðingu á nokkrum versum í fegursta sálmi hans: Hvað
boðar nýárs blessuð sól? Hefði verið æskilegt að fá þýðingu á
fleiri sálmum í bókinni, en höfundur hefir ekki fengið komið
því við. Um sálma séra Valdimars segir, að þeir séu margir
djúpir og fagrir, og er farið mjög lofsamlegum orðum um hann
sem sálmaskáld. Þó hefði þurft að gjöra sálmum hans nokkru
fyllri skil, bæði af því, að sumir þeirra eru hreinar perlur og
séra Valdimar hefir á síðari árum trauðla verið skipaður sá
sess í íslenzkri bókmenntasögu, sem honum ber.
Höfundi er Ijúft og hugleikið að rita um sálma, enda er hann
sjálfur sálmaskáld. A. G.