Tímarit Máls og menningar - 01.11.1983, Side 32

Tímarit Mdls og menningar
merki þess að viðkomandi er ekki enn algerlega fæddur, að hann verður
ekki fæddur til lífsins fyrr en hann deyr.
Að lokum verð ég að biðjast afsökunar á því að líklega hefur mér
mistekist að þýða nógu vel reynslu mína af því að hafa þýtt bækur í víðri
merkingu, og þá lífið um leið. En ég held að meginmál mitt og ætlun hafi
verið sú að láta öðrum vera örlítið ljóst hvað allt er öðru tengt og skylt, og
að þótt við séum öll einstaklingar og að sérhver hlutur sé hann sjálfur og um
leið þá illþýðanlegur erum við jafnframt hluti af heild sem við túlkum og
þýðum, hver sitt brot fyrir annan, með orðum okkar og æði. Bók er aðeins
brot af þessari heild og viðleitni. Hún er ekki áleitin á sama hátt og
fjölmiðillinn. Hún er alein og þess vegna saklaus. Enginn þarf að taka hana
upp nema hann æski þess. En við lestur nær bókin til þess hluta sálarinnar
sem næstum innstur er, af því lesandinn er ævinlega einn með sinni bók og
lestur er sama einsemdarstarf og samning bókarinnar, og það er þessi
ómeðvitaði skilningur lesanda og höfundar sem leyfir þeim að stunda
sameiginlegt þýðingarstarf.