Ritið : tímarit Hugvísindastofnunar - 01.10.2016, Síða 115

114
hálft prósent þjóðarinnar í söfnuðinum, árið 1994 var það hlutfall komið
í eitt prósent en í dag stendur sá hluti í þremur prósentum. Fjölgunin er
að stærstum hluta vegna innflytjenda frá kaþólskum löndum, til að mynda
Póllandi.43
Kaþólski söfnuðurinn er því í miklum minnihluta í íslensku samfélagi
en hefur samt sem áður viss ítök og sýnileika í samfélaginu sem studd eru
af kaþólsku kirkjunni í alþjóðlegu samhengi og af páfanum í Róm. Það
endurspeglast ekki síst í rýmislegu umfangi safnaðarins í borgarlandslaginu
sem kristallast í glæsilegri kirkjunni sem trónir yfir gamla Vesturbænum á
Landakotshæðinni. Landakotsskóli er í dag sjálfseignarstofnun og hefur
ekki verið undir stjórn kaþólsku kirkjunnar frá því árið 2005 en starfsemi
hans er enn í húsnæði kaþólsku kirkjunnar við Túngötu í Reykjavík.44
Landakotsreiturinn allur er því enn í dag eitt mikilvægasta tákn kaþ-
ólsku kirkjunnar á Íslandi eftir siðaskiptin 1550. Hann er um leið rós í
hnappagati kaþólikka á Íslandi og ákveðið sameiningartákn sem verður
að kennileiti í sjálfsmynd þeirra. Þrátt fyrir að skólinn hafi tekið miklum
breytingum hefur kaþólskri starfsemi hans verið hampað af íslenskum yfir-
völdum. Höfundur Reimleika í Reykjavík byrjar til að mynda frásögnina
um Landakotsskóla á því að segja að séra Ágústi Georg hafi verið veitt
fálkaorða forseta Íslands árið 1994 fyrir störf sín í Landakotsskóla.45
Landakotsskóli er því hluti af minnisvettvangi sem varðveitir opinberar
og menningarlegar minningar tiltekins hóps í samfélaginu. Að sama skapi
geymir hann einnig óopinberar minningar sem birtast ekki sem hluti af
menningarlegu minni kaþólsku kirkjunnar. Reiturinn er því skýrt dæmi
um minnisvettvang og stað í borgarrýminu sem haldinn er reimleikum;
þar sem minningar ákveðins hóps um ofbeldi hafa ítrekað verið bældar.
Greinargerðin í Reimleikum í Reykjavík gerir tilraun til að skapa drauga-
sögu úr þessum aðstæðum og endurvekja hinar þögguðu minningar. Í stað
þess þó að einbeita sér að frásögnum fórnarlambanna leggur hún áherslu
á að greina þá reimleika sem minningin um hinn látna geranda skapar á
staðnum.
Höfundurinn heimsækir skólabygginguna með miðli til þess að athuga
hvort hægt sé að finna fyrir nærveru kennarans Margrétar Müller sem
framdi sjálfsvíg á skólasvæðinu. Sú heimsókn verður að kjarnanum í
43 Sama heimild.
44 „Um okkur“, Landakotsskóli, sótt 8. desember 2015 af http://www.landakotsskoli.
is/index.php/skolinn/um-okkur.
45 Steinar Bragi, „Landakotsskóli“, Reimleikar í Reykjavík, bls. 67.
veRa knútsDóttiR