Múlaþing: byggðasögurit Austurlands - 01.01.2006, Page 155

Ferð á Alþingishátíðina á Þingvöllum 1930
sást ölvaður og troðningur var furðu lítill.
Ræður og íþróttir toru þannig fram, að allir
gátu notið þeirra, en því miður verður ekki
hið sama sagt um hátíðarsönginn í gjánni.
Þó efast ég ekki um að hann hafl tekist
mjög vel.
Talsverður ágalli var það og hvað
tjaldborgin var langt frá hátíðasvæðinu. Eg
dreg það í engan efa að sú vegalengd var
engu minni en frá Bakkagerði út undir Nes,
því það tók allt að þremur korterum að
ganga á milli. En þetta eru allt smámunir
þegar litið er til baka. Hitt vegur meira að
útlendingar, sem sóttu hátíðina, urðu hrifnir
af henni og sáu, að hér búa ekki Skrælingjar
eða skríll, heldur frjáls menningarþjóð í
fögru og svipmiklu landi, sem bar gæfu til
að halda 1000 ára hátíð ríkis síns með heiðri
og sóma, þúsund ára hátíð móður þinganna
í heiminum, eins og breski fulltrúinn komst
að orði.
Fyndist mér vel við eiga að þing og
stjórn gengjust fyrir því, að út væri gefin
skrautprentuð bók um hátíð þessa á þremur
stærstu tungumálunum og hún prýdd Ijölda
mynda og gefín þjóðum þeim, sem hátíðina
sóttu í virðingar og þakklætis skyni. Myndi
það ekki síst halda nafni íslendinga á lofti.
En mest ber mönnum að þakka forsjóninni
sem oftar fyrir það, að gefa gott veður þegar
rnest á reið, því annars hefði lítill hátíða-
bragur orðið og hátíðin mistekist með öllu.
A laugardagskveldið síðla ók ég frá
Þingvöllum í yndislegu veðri. Kveldsólin
roðaði efstu brúnir Armannsfells og lýsti
upp Skjaldbreið og Hlöðufell í einkenni-
legum bjarma. I austri risu Hrafnabjörg og
Tindaskagi í blámóðu fjalla, en í suðri lá
Þingvallavatn sem spegilsléttur hafflötur og
endurspeglaði alla þessa náttúrudýrð. Frá
íþróttapallinum hljómaði hornamúsikin þar
sem unga fólkið steig dans í kveldkyrrðinni
og bergmálið kvað við í gjánum. Það var
síðasti ómurinn sem til mín barst frá
Þingvallahátíðinni, síðasta kveðjan.6
Tilvísanir og athugasemdir
1 Ingvar Nikulásson prestur á Skeggjastöðum á
Langanesströnd 1907 - 1936.
2 Samkvæmt munnlegum upplýsingum frá
Guðrúnu, dóttur séra Ingvars var annar
maðurinn sem fór með honum á
Alþingishátíðina, Páll Sveinsson sem þá var
bóndi í Breiðuvík, faðir Sigurðar O.
Pálssonar. Ekki er vitað hver þriðji maðurinn
var sem fór á hátíðina frá Borgarfirði eystra.
3 Kristján konungur tíundi.
4 Tryggvi Þórhallsson var forsætisráðherra
1927- 1932.
5 Jón Helgason, sem var skipaður biskup 8.
febrúar 1917 og gegndi embættinu til 1938.
6 Frásögn þessa eftir sr. Ingvar Sigurðsson, afa
minn, prest á Desjarmýri 1912 - 1961, hef ég
undirritaður fært inn í tölvu eftir handriti
hans og búið til prentunar. Hann hét fullu
nafni Vigfús Ingvar Sigurðsson. Sr. Ingvar
Sigurðsson lést 11.06.1967.
Guðgeir Ingvarsson frá Desjarmýri.
153