Múlaþing: byggðasögurit Austurlands - 01.01.2011, Page 7

Að lesa í landið
Við sem komin erum yfir miðjan aldur, eins og sagt er, höfum flest áhuga á því
sem við sjáum í umhverfinu. Landslagið með allan sinn fjölbreytileika er okkur
sem á íslandi búum ómetanlegur fjársjóður. Villt dýr og gróðurfar setja svo enn
frekar svip sinn á umhverfið, oft með sérstöðu sinni fyrir norðlægar slóðir.
Margir skoða t.d fuglana af mikilli ástríðu, sumir með það eitt í huga að sjá
sem flestar tegundir, aðrir til að fanga gott augnablik á fallega mynd og enn aðrir
til að virða fyrir sér atferli tegunda á mismunandi árstímum. Göngufólk nýtur
þess að fara í gönguferðir og taka myndir af landslaginu í leiðinni.
Þeir sem eru góðir í að lesa í landið verða fróðari um sitt nánasta umhverfi en
þeir sem aldrei gefa sér tíma til að njóta þess sem náttúran og umhverfið hefur
upp á að bjóða. Jafnvel ganga menn fram á eitthvað í náttúrunni sem enginn
hefur áður tekið eftir t.d. fomar rústir eða aðrar fornminjar. Allt er þetta hluti af
umhverfi okkar.
Það veldur okkur sem erum að ala upp börn og unglinga sennilega stundum
áhyggjum hve mikill tími fer í það að sitja við tölvuskjáinn í stað þess að fara út
og kynnast því sem fyrir augun ber. Við fullorðna fólkið eigum þar nokkra sök,
við verðum að gefa okkur tíma, frá hinu daglega amstri lífsgæðakapphlaupsins,
til þess að hjálpa bömunum okkar að læra það, að lesa í landið.
Gönguferðir, fuglaskoðun, veiðitúr, tjaldútilega eða eitthvað annað sem
hjálpar til við að vekja áhuga barnanna okkar á því sem náttúra landsins býður
upp á allt í kringum okkur er vissulega þarfur hluti af uppeldinu. Þannig læra
menn betur að þekkja sitt nánasta umhverfi og mikil vitneskja flyst frá einni
kynslóð til annarrar, vitneskja sem annars myndi glatast.
Þeir greinahöfundar sem senda inn efni til birtingar í tímaritum eins og
Múlaþingi em einmitt oft þeir sem hafa lært að lesa í landið og koma því sem fyrir
augun ber á blað. Þannig deila þeir upplifun og vitneskju sinni til lesendahópsins
og koma í veg fyrir að ýmislegt falli í gleymskunnar dá.
Að venju er þetta hefti Múlaþings sem nú kemur fyrir sjónir lesendanna fullt
af slíku efni. Njótið vel.
JGG
5