Skírnir - 01.09.1995, Blaðsíða 67

SKÍRNIR
JEG ER 479 DÖGUM ÝNGRI EN NILLI
337
ásamt bróður sínum ísleifi. Þar var grunnurinn lagður að nokk-
urri sérþekkingu sem Halldóri tókst að nýta sér á marga vegu á
næstu árum. Helsti árangur námsins var sá að hann tók að vinna
fyrir sér sem kennari yfir háveturinn. Hann gerði oftast ítarlega
grein fyrir stöðu nemenda sinna við upphaf og lok kennslunnar.
Einnig greindi hann frá því hvað börnin lærðu frá degi til dags.
Við kennsluna beitti Halldór ekki neinum vettlingatökum og það
leynir sér ekki að hann var kröfuharður: „I dag hef jeg sagt til
börnunum frá kl 10 og til kl. 9. að frá teknum tveimur tímum
tæpum í rökkrinu. Jeg get enn þá ekki sagt þeim til í reikningi
vegna þess að ennþá vantar bæði eitt spjaldið og griffla."67 Yfir-
leitt stóð kennslan í nokkrar vikur á hverjum bæ og fór stundum
fram við erfið skilyrði: „Svo fór jeg að Bólstað og ætlaði eins og
umtalað var áður að vera þar 3. vikur við kennslu, en Bjarni gat
þá ekki tekið mig fátæktarvegna, fór jeg þá strax um hæl þaðan og
fram að Kirkjubóli; verð jeg þar um tíma að segja til krökkum.
Jeg er nú orðin sárleiður á þessum hringlandaskap í blessuðu
fólkinu með mig og kennsluna."68 Þegar Halldór hafði hreiðrað
um sig á Kirkjubóli tók ekki betra við: „Jeg hef í dag sagt krökk-
unum til, og hefur það verið æði óþægilegt í dag af troðningi og
þrengslum aðkomumanna."69
Halldór átti einnig eftir að nýta sér þá grunnmenntun sem
hann fékk hjá séra Arnóri á annan hátt. Hann hafði nokkuð
stöðugar tekjur af uppskriftum fyrir hreppinn, sparisjóðinn,
verslunardeildina og búnaðarfélagið en fyrir lestrarfélagið vann
hann í sjálfboðavinnu. Auk þess gegndi Halldór trúnaðarstörfum
í þessum félögum og sökum kunnáttu hans og verklagni var oft
leitað til hans með sjálfstæð verkefni.
Halldór var einnig annálaður og eftirsóttur vegghleðslumaður
og á vorin hófust garðhleðslur, húsabætur og jafnvel jarðabætur:
„Nú eru eptir átján faðmar að hlaða til þess að túnið sje algirt og
67 Lbs 1862 8vo - 8. desember 1896.
68 Lbs 1864 8vo - 27. mars 1898.
69 Lbs 1864 8vo - 30. mars 1898.