Gríma - 01.09.1948, Blaðsíða 62

60 ÞJÓÐSÖGUR [Gríma
í baðstofu að spjalla saman í náðum. Vissu þær þá
ekki fyrr til en eitthvert óttalegt bákn brölti upp á
baðstofuna norðanverða og braut þrjú borð í súðinni;
urðu þær dauðhræddar, því að það var engu líkara en
að ibaðstofuþakið væri að detta inn. Ruku þær upp í
ofboði, slökktu ljósið og þutu fram til piltanna og
sögðu þeim, að einhver voðaleg skepna væri að brjóta
niður baðstofuna. Varð piltunum ekki um sel, fleygðu
frá sér spilunum og slökktu ljósið; gripu þeir hákarla-
skálmar, sem héngu í skálanum, læddust út á hlaðið og
út fyrir bæinn og svipuðust eftir, hvaða skepna væri
þar á ferð. Heyrðu þeir hringl úti á túninu og sáu
glóra í einhverja kolsvarta skepnu, sem var stærri en
nokkurt hross. Logn var úti, og stöldruðu piltar við
stundarkorn til að hlusta eftir hringlinu, sem var lík-
ast því, að margar skeljar væru hristar til í pjátur-
dunk. Þokaðist skepna þessi 'hægt og hægt út fyrir tún-
garðinn, og hurfu piltar þá aftur inn í bæinn, því að
þeir þorðu ekki að veita eftirför öðru eins ferlíki. Voru
engin ljós tendruð aftur í Útibæ, það sem eftir var
nætur. — Morguninn eftir var rakin slóð eftir skrímslið
frá baðstofunni, út túnið og út fyrir túngarð; lá hún
þaðan niður í Eiðiskrók, sem kallaður er, og þar hafði
það horfið í sjóinn. Hugðu menn helzt, að skrímslið
hefði komið á land í Eiðiskrók vestara, því að þar
sást traðk nokkurt, en sporunum var þannig lýst, að
þau væru eins og eftir kvartilsbotn og hér um bil
kringlótt.
Þegar eg var ungur, heyrði eg marga segja frá þess-
um atburði í Flatey, og sjálfur man eg eftir því, að á
gömlu baðstofunni í Útibæ voru brotin þrjú borð í
súðinni norðanverðri. Voru þau talin þögull vottur
um heimsókn skrímslisins.