Strandapósturinn - 01.06.2009, Qupperneq 21

19
Á stórafmælisári sem þessu þótti afar viðeigandi að veita þeim
kórfélögum viðurkenningu sem lengst höfðu starfað með kórn-
um og voru enn virkir í kórstarfinu. Eftir könnun meðal kórfélaga
kom í ljós að fimm þeirra höfðu sungið með kórnum nær óslitið
í 35 ár eða lengur. Þeir sem lengstan starfsaldur höfðu voru Aðal-
björg Sigurðardóttir, Guðrún E. Kaaber, Laufey Eysteinsdóttir,
en hún var einnig fyrsti formaður kórsins og gegndi því hlutverki
í átta ár, Ingimundur Guðmundsson og Steinn Gunnarsson.
Ákveðið var að nýta tækifærið á vortónleikunum og gera þessa
ágætu félaga að heiðursfélögum í kórnum, bæði vegna tryggðar
þeirra við kórinn og ekki síst vegna þess að þeir hafa verið öðrum
kórfélögum jákvæð fyrirmynd í hvívetna. Þessu til staðfestingar
var hverju þeirra afhent heiðursskjal og blómvöndur.
Á vortónleikunum gaf Ágústa Eiríksdóttir kórnum rausnarlega
peningagjöf upp á 100 þúsund krónur í minningu Magnúsar
Jónssonar frá Kollafjarðarnesi, en hann var stjórnandi kórsins um
árabil. Peningunum var ætlað að nýtast sem ferðastyrkur vegna
fyrirhugaðrar ferðar til Ungverjalands.
Heiðursfélagar Kórs Átthagafélags Strandamanna, frá vinstri: Laufey
Eysteinsdóttir, Ingimundur Guðmundsson, Guðrún E. Kaaber, Steinn
Gunnarsson og Aðalbjörg Sigurðardóttir.