Strandapósturinn - 01.06.2009, Síða 66
64
farið suður fyrir Kjalarnes, heldur dvalið allan tímann í
Leifsbúðum á Vínlandi, sem líklegt er þá að verið hafi við
Lárentsfljót/Lárentsflóa í Kanada. Eiríkssaga segir hins veg-
ar ítarlega frá dvöl Karlsefnis og félaga á syðri slóðum.
– Grænlendingasaga segir frá sex Vínlandsferðum ef ferð
Bjarna Herjólfssonar er talin með, en Eiríkssaga nefnir
aðeins þrjár ferðir, en slær ferðum Karlsefnis, Þorvaldar
Eiríkssonar og Freydísar saman í eina.
Þetta og margt fleira veldur bagalegu ósamræmi milli sagn-
anna sem erfitt er/verður eða ómögulegt að finna skýringar á.
Vínlandsferðirnar
Vafalítið má telja að meira mark sé takandi á frásögnum
Eiríkssögu rauða um ferð Karlsefnis og Guðríðar og félaga til
Vínlands og áfram suður til Straumfjarðar og alla leið suður til
Hóps, svo og helstu viðburða í þeirra ferðum. Ekki getur talist
ólíklegt að Straumfjörður hafi verið Fundyflói vestur af Nova
Scotia og bæjarstæði Karlsefnis og Guðríðar hugsanlega þar
sem borgin Saint John í New Brunswick í Kanada er nú. Og
Hóp hafi verið þar sem nú er höfn heimsborgarinnar New York.
Staðháttum á þessum stöðum svipar mjög til lýsinga á þeim í
Eiríkssögu, eins og Páll Bergþórsson veðurfræðingur gerir ítar-
lega grein fyrir í bók sinni, Vínlandsgátan. En Grænlendingasaga
er hins vegar vafalítið trúverðugri um ferðir Leifs, bræðra hans
og samferðamanna þeirra, enda fjallar hún ítarlegar um þær.
Ef þetta er rétt ályktað hefur Leifur farið einskipa í kjölfar
Bjarna Herjólfssonar um Helluland (Baffinseyju) og Markland
(Labrador) vestur fyrir Nýfundnaland og inn í Lárentsflóa og
að líkindum upp í Lárentsfljót inn á þær slóðir sem borgin
Quebec er í dag og byggt þar annað hvort bráðabirgðahús eða
jafnvel hinar eiginlegu Leifsbúðir, sem hugsaðar voru sem var-
anlegur bústaður til lengri tíma. Má jafnvel gera því skóna að
þarna hafi Vínland verið (Páll Bergþórsson), þó hugsanlegt
sé að nafnið Vínland hafi síðar tekið yfir víðara svæði og náð
austur með ströndum New Brunswick í Lárentsflóanum og
hugsanlega lengra suður og jafnvel vestur með ströndum New
Brunswick og nyrstu strandfylkja Bandaríkjanna allt til New