Árbók Landsbókasafns Íslands - Nýr flokkur - 01.01.1991, Blaðsíða 21

KARL O. RUNÓLFSSON TÓNSKÁLD
21
1970 var hann yflrkennari og aðalstjórnandi barna- og ung-
lingalúðrasveita í Reykjavík. Hefur þá verið stiklað á stóru um
lúðrasveitarstarf Karls O. Runólfssonar, en það var umfangsmikið
og hefur verið mikils metið, svo sem marka má af því að hann var
heiðursfélagi Lúðrasveitar Reykjavíkur, Lúðrasveitarinnar Svans
og Sambands íslenskra lúðrasveita.
Allt var þetta í upphafi tómstundastarf. En þó leitaðist Karl við
að afla sér þeirrar þekkingar á tónlist sem kostur var. Hjá
stjórnendum og leiðbeinendum lúðrasveitanna mun hann
snemma hafa fengið tilsögn í trompetleik og Hallgrímur Þor-
steinsson sagði honum einnig eitthvað til í tónfræði. Fiðluleik lærði
hann hjá Pórarni Guðmundssyni og einhverntíma naut hann
tilsagnar í píanóleik hjá Jóni Leifs. Lúðrasveitin Gígja réð til starfa
þýskan hornleikara, Otto Böttcher, vorið 1922, í formannstíð
Karls. Böttcher varð stjórnandi og kennari Gígju og síðar Lúðra-
sveitar Reykjavíkur eftir sameininguna með Hörpu. I stjórnanda-
tíð hans var settur á stofn vísir að tónlistarskóla, sem raunar varð
skammlífur, en enginn vafi er á að Karl hefur notfært sér þá
kennslu sem þar stóð til boða.
Tónlistin varð æ fyrirferðarmeiri þáttur í lífi Karls, og að því
kom árið 1925, eins og áður var getið, að hann sagði skilið við
prentverkið og helgaði sig tónlistinni. Þessi ákvörðun mun hafa átt
talsverðan aðdraganda, en þegar hún var tekin beið Karl ekki
boðanna en fór til náms í Kaupmannahöfn. Lærði hann trompet-
leik hjá Lauritz Sörensen og fiðluleik hjá Aksel Jörgensen, en
kennararnir báðir voru hljóðfæraleikarar í konunglegu hljóm-
sveitinni í Kaupmannahöfn. Ennfremur lagði hann stund á og
lærði lúðrasveitarútsetningu hjá Dyring nokkrum sem var stjórn-
andi lífvarðarsveitar konungs. Eftir tveggja ára dvöl í Danmörku
kom hann aftur heim og starfaði þá um skeið á ýmsum stöðum,
lengst á Akureyri, 1929-34, við kennslu og þjálfun hljómsveitar og
lúðrasveitar og við hljóðfæraleik. Svipuðum störfum hafði hann
áður gegnt á ísafirði um hálfs árs skeið, 1922-23. Eftir að Karl
settist að í Reykjavík 1934 innritaðist hann í Tónlistarskólann sem
hafði tekið til starfa haustið 1930 og lagði nú stund á kontrapunkt
og tónsmíðar fyrst undir handleiðslu dr. Franz Mixa og síðar hjá
dr. Victor Urbancic. Einnig lærði hann fiðluleik hjá Hans
Stepanek. Jafnframt og síðar stundaði hann þau tónlistarstörf sem
til féllu, lék á fiðlu í Hljómsveit Reykjavíkur en trompet í Utvarps-
hljómsveitinni og Sinfóníuhljómsveitinni eftir að hún tók til starfa