Árbók Landsbókasafns Íslands - Nýr flokkur - 01.01.1991, Blaðsíða 27
KARL O. RUNÓLFSSON TÓNSKÁLD
27
inu fylgir uppkast að svari, örstutt æviágrip og drög að greinar-
gerð um átta verk tónskáldsins. Greinargerðin er ekki nákvæm og
er hér sýnilega verið að leggja efni í hendur einhverjum sem hefur
átt að ganga endanlega frá henni. Iðulega er vísað til „lista yfir verk
mín“ sem Karl hefur ekki haft handbæran og ekki hefur heldur
fylgt handritum hans til Landsbókasafns. Verkin sem hann hefur
hér valið til sérstakrar kynningar eru þessi (ritunarár innan sviga
eins og þau eru hér tilgreind):
1. Forleikur að Fjalla-Eyvindi, op. 21 (1949)
2. Sónata fyrir trompet og píanó, op. 23 (1950)
3. A krossgötum, hljómsveitarsvíta, op. 12 [sic] (1939)
4. Ég biö að heilsa, ballett, op. 27 (1952)
5. Sinfónía í f-moll (Esja), op. 54 [sic] (1964 og 1967)
6. 6 vikivakar (ísl. dansar), op. 60B (1964—67)
7. Dimmalimm, barnaballett, op. 30 (1953)
8. Tíu ísl. þjóðlög fyrir hljómsveit (1938).
Fljótt á litið gæti sýnst að tónskáldið hafi tínt hér til þau verka
sinna sem honum sjálfum þótti mest til koma. En þegar betur er
skoðað verður ljóst að hér kemur fleira til. Vafalaust ræðst valið
mjög af því að verið er að leggja drög að kynningu í erlendu riti,
fyrir erlenda lesendur og hugsanlega notendur tónverkanna. Þess
vegna hefur verið gengið fram hjá verkum með íslenskum textum,
sönglögum og kórverkum sem mörg hljóta þó að teljast meðal
merkustu verka tónskáldsins. Eingöngu hljóðfæraverk hafa orðið
fyrir valinu, og vekur þá aftur athygli að sleppt er t. d. fiðlusónöt-
unni, op. 14, hljómsveitarsvítunni Endurminningar smaladrengs, op.
50, og ballettinum Prinsinn og rósin, op. 57. Sónatan fyrir hnéfiðlu
og píanó, op. 65, hefur ekki verið fullsamin þegar þessi skrá var
gerð.
Um öll þessi verk mætti margt segja og ástæða er til að nefna
nokkur fleiri. Forleikur að Fjalla-Eyvindi Jóhanns Sigurjónssonar
er eitt aðalverkið á hljómplötu með verkum Karls, sem Fálkinn hf.
gaf út 1970, og sönglög úr leikritinu hafa náð miklum vinsældum.
Á plötunni eru einnig 6 vikivakar, þótt naumast geti þeir talist
meðal merkustu verka Karls að dómi þess sem þetta ritar. Um
Trompet-sónötuna segir Karl sjálfur (1968) að hún hafi verið ílutt „á
15 stöðum í öllum heimsálfum“. Þeir staðir gætu nú verið orðnir
miklu fleiri, enda var sónatan gefin út á vegum Menningarsjóðs á
fyrra helmingi 7. áratugarins og mun vera það verk Karls sem