Tímarit Máls og menningar - 01.10.2016, Page 81

TMM 2016 · 3 81
Beatriz Portugal
Mórberjatréð
Sigurlín Bjarney Gísladóttir þýddi
Fuglastrákur – þegar Stella heyrði foreldra sína segja þetta orð sá hún fyrir
sér pínulítinn fugl með andlit stráks. En svo áttaði hún sig á því að fullorðna
fólkið myndi ekki taka eftir litlum fugli og dró þá ályktun að líklega væri um
að ræða venjulegan strák en með fuglsvængi.
Ekki nema þetta væri eins og hún hafði ímyndað sér þegar hún var lítil,
hugsaði hún spennt: allir með eins konar litla-sjálf í höfðinu sem stjórnaði
þeirra stóra-sjálfi. Stjórnborð með lítilli Stellu sem togaði í stöng svo að stóra
Stella hreyfði handlegginn og opnaði munninn. Blikkandi augu sem földu
litlu Stellu sem horfði út í heiminn. Kannski var fuglastrákurinn lítill fugl
sem stjórnaði líkama stráks. En hún var fljót að útiloka þann möguleika líka
því enginn hafði séð litla fuglinn þar inni og því aldrei uppgötvað að þarna
væri fuglastrákur á ferðinni.
Fuglastrákur! Stella hafði aldrei séð fuglastrák, hafði ekki einu sinni vitað
að þeir væru til! Hún kom sér niður á mynd af strák með vængi. Brúnt hár
og brúna vængi.
Hún sat hljóð meðan foreldrar hennar töluðu saman en skildi ekki merk-
ingu nokkurra orða eins og þegar móðir hennar sagði að fólk skorti umburðar-
lyndi og að strákurinn ætti við andleg veikindi að stríða. Var hann væng-
brotinn? Hún nartaði í matinn eins og hún ímyndaði sér að fugl myndi gera.
Seinna sat hún á gólfinu með pappír og liti. Tré birtist á pappírnum. Brúnn
trjábolur, græn lauf og efst á toppnum sat strákur með brúnt hár og brúna
vængi. Stella leit á teikninguna. Hún hafði ekki teiknað hreiður svo hún
smeygði gulri línu á milli trés og stráks. Hún notaði gula litinn til að teikna
stóra sól og svo virti hún teikninguna fyrir sér aftur.
Hún reyndi að muna fleira af því sem hún hafði heyrt.
Strákurinn býr uppi í tré.
Þau vilja ekki hafa hann þar.
Þau eru vond við hann.
Stella grúfði sig aftur yfir teikninguna og setti spýtukalla í kringum tréð.
Með rauða litnum lét hún nokkra ulla á fuglastrákinn. Hún teiknaði sorg-
mætt andlit á fuglastrákinn. Litla greyið, hugsaði hún.
Minning kom upp í hugann. Fugl í tætlum á veginum, blóðug hrúga af
fjöðrum og holdi. Systir hennar kom til að sjá hvað hún væri að horfa á.