Tímarit Máls og menningar - 01.10.2016, Blaðsíða 85
M ó r b e r j a t r é ð
TMM 2016 · 3 85
strákurinn var horfinn. Dagarnir liðu. Það voru hvorki merki um hann í
trénu né í næsta nágrenni. Þær keyptu áfram pão de queijo í tveimur pokum
og vonuðu að á leiðinni úr bakaríinu myndi hann stökkva óvænt úr nýju
tré – nýtt töfrabragð.
Þegar mamma hennar sagði orðin strákur og fugl leit Stella upp frá dótinu
sínu. Foreldrar hennar voru að ræða um hann. Hún færði sig nær. Þau veltu
því fyrir sér hvort félagsþjónustan hefði sótt hann eða hann flúið. Eða flogið
burt, hugsaði Stella.
Án vitneskju Stellu og systur hennar höfðu verið greinar um strákinn í
fréttunum. Fuglastrákurinn sem bjó í tré í ríku hverfi í São Paulo. Ef hann
hefði búið annars staðar í þeim frumskógi sem borgin var hefðu eflaust fáir
tekið eftir honum. En í þessu hverfi höfðu sumir litið á hann sem plágu,
sjónmengun, sagði gamall maður. Annar maður lagði til að þau felldu tréð.
Þau vildu losna við hann. Eina nóttina var ráðist á strákinn með hrákum og
uppnefnum sem varð til þess að aðrir íbúar tóku höndum saman og gættu
hans á nóttunni, bætti mamma þeirra við.
Sitjandi á litlum kollum vakti hópur af sex til tíu manns yfir fugla-
stráknum þær nætur sem hann neitaði að sofa í húsum þeirra. Þau leituðu
að foreldrum hans. Félagsþjónustan mætti á svæðið. Sama gerði lögreglan.
Öll spurðu þau um nöfn, dagsetningar og skjöl. Gagnslausar spurningar sem
strákurinn gat ekki svarað og hræddu hann bara. Félagsþjónustan kom aftur
og lögreglan sömuleiðis. Þau vissu ekki hvort þeirra tóku hann að lokum.
Ekki nema hann hafi flúið eftir allt saman eða foreldrar hans fundið hann.
„Barn á ekki að þurfa að búa við þessar aðstæður,“ sagði pabbi Stellu.
„Ef hann væri nú eina barnið …“
„Hann heitir João,“ sagði Stella. „Hættið að kalla hann fuglastrák. Þið
ættuð að vita hvað hann heitir, allir strákar hafa nafn. João. Hann er hrifinn
af Vidda úr Toy Story og hann langar að verða töframaður.“
Stella sagði foreldrum sínum að hún trúði því ekki að hann hefði flúið.
Hún var viss um að hann hefði flutt sig um set. Hann sagðist ætla að gera
það. Að flytjast búferlum. Kannski var hann á leiðinni til Íslands. Þær Elena
höfðu sagt honum frá Íslandi og hann hafði aldrei áður heyrt um stað þar
sem börn væru ekki á götunni. Hann spurði um mórberjatré á Íslandi. Elena
sagði honum að þar væru birkitré. Stellu þótti fyndið að hann vissi ekki hvað
snjór væri. Hún sagði honum að snjór væri eins og rigning en án vatnsins og
að hann væri kaldur og safnaðist saman á jörðinni, hann gæti verið mjúkur
eða harður og stökkur. Hann sagði að kannski myndi hann flytja sig um set
og finna annað tré við aðra götu. Kannski myndi hann sjá snjó. Kannski
myndi hann breyta úr mórberjum yfir í birki. Stella hugsaði með sér að hann
hefði loksins breitt út vængina og flogið. Já, frá mórberjum til birkis.