Strandapósturinn - 01.06.2009, Síða 58

56
Svavar Jónatansson, verkfræðingur
og vínbóndi
Vínland Leifs
Eiríkssonar og
vínlandsviður-
inn á Vínlandi
Forspjall
Margt hefur verið rætt og ritað um Vínland Leifs Eiríkssonar, til-
vist þess og staðsetningu á austurströnd Norður-Ameríku. Fundur
rústa norrænna húsa í L’Anse aux Meadows á Nýfundnalandi
tekur af allan vafa um að norrænir menn sigldu frá Grænlandi
til Norður-Ameríku um árið 1000. Þetta sanna rannsóknir Helge
Ingstad og konu hans Anne Stine á sínum tíma. Þar með er
ekki sagt að Vínland hafi verið nyrst á Nýfundnalandi. Þvert á
móti er óhugsandi að vínviður hafi vaxið þar vegna kaldrar og
óblíðrar veðráttu á því landsvæði og því ekki um hið eiginlega
Vínland Vínlandssagnanna þar að ræða, þ.e. það Vínland þar
sem Leifur heppni og félagar fundu vínvið með þroskuðum
vínberjum eins og Vínlandssögurnar báðar, Eiríkssaga rauða
og Grænlendingasaga greina frá. Vínlandsnafnið kemur oft
fyrir í sögunum og margar sagnir af vínþrúgum og eftirsókn
Vínlandsfaranna í þær. Vafalítið er að vínvið var að finna á
Vínlandi Leifs Eiríkssonar, enda vex villtur vínviður enn í dag á
þeim svæðum sem líklegast er að Vínland hafi verið. Jafnframt
er líklegt að gera hafi mátt drykkjarhæft vín úr þrúgum þessa
vínviðar. Vínlandsfararnir gætu því hafa framleitt sitt eigið vín
þó það hafi sennilega ekki verið í háum gæðaflokki. Með í för
var fagmaður, „Tyrkir suðurmaður“, og kunni hann tvímælalaust