Tímarit Máls og menningar - 01.06.1992, Blaðsíða 62

Sigurður E. Guðmundsson
Athugasemd
í tilefni af grein eftir Guðmund P. Ólafsson
í 1. hefti Tímarits Máls og menningar á
þessu ári birtist grein eftir Guðmund Pál
Ólafsson, sem heitir „Byggð og landslag —
og fuglasöngur“. Þar staðhæfir höfundur,
að bændur hafi látið Teiknistofu landbún-
aðar og Húsnæðisstofnun ríkisins segja sér
fyrir verkum, að því er byggingar varðar.
Við það lætur hann þó ekki sitja, heldur
bætir um betur og fullyrðir, að „Húsnæðis-
stofnunin [hafi] beinlínis neytt menn til að
nota staðlaðar teikningar og eftir þeim voru
byggð einhver ljótustu íbúðarhús, sem um
getur til sveita“. Um þetta er síðan fimbul-
fambað nokkuð frekar. Og ritstjóranum,
eða höfundi, fínnst svo mikið til þessarar
uppljóstrunar koma, að hann birtir hana
með stækkuðu letri. Enda um stórmerki að
ræða, ef rétt er með farið. En hvað skyldi
vera til í þessu?
Það er skemmst frá því að segja, að þessi
staðhæfing er að sjálfsögðu ekki í neinum
tengslum við veruleikann og það er ekki
flugufótur fyrir henni. Húsnæðisstofnunin
hefur aldrei sagt neinum fyrir verkum, að
þessu leytinu til, hvorki bændum né öðrum.
Hún hefur heldur ekki neytt einn eða neinn
til að nota staðlaðar húsateikningar, hvorki
beinlínis né óbeinlínis. Vissulega hefur
tæknideild hennar hannað og selt íbúða-
teikningar um áratugaskeið, en aðeins sára-
fáar hafa verið notaðar til sveita. Þær setja
því lítinn svip á. „Ljótt“ er að vísu afstætt
hugtak, en þess má þó geta, að virtir arki-
tektar hafa fullvissað undirritaðan um að
húsateikningar þær, sem hannaðar hafa ver-
ið í tæknideild stofnunarinnar um áratuga-
skeið, standi engum að baki. Enda sóma
þær sér hvarvetna prýðilega.
Það er dapurlegt til þess að vita að höf-
undur greinarkoms þessa skuli spilla mál-
flutningi sínum með hroðvirkni af því tagi,
sem hér hefur verið gert að umtalsefni.
Greinin er að öðru leyti þörf áminning um
mál, sem hefur fengið sáralitla umfjöllun.
Vonandi verður framhald á málefnalegum
umræðum um nauðsyn þess, að hönnuðir
taki fyllsta tillit til náttúru landsins og nán-
asta umhverfis við hönnun mannvirkja og
staðsetningu þeirra.
60
TMM 1992:2