Saga - 2012, Qupperneq 67

inn á ársþingið í Amsterdam.98 Þá voru í bréfi Chapman Catt nokkr-
ar leiðbeiningar um hvernig slíkt samband skyldi myndað. Að end-
ingu vonaði hún að stórt og vel skipað íslenskt landsfélag yrði búið
að biðja um upptöku í alþjóðasambandið á fundinum í Lundúnum
1909. Í svarbréfi til Bríetar, dagsettu í desember, segist Catt svo glöð
munu senda bréf til Kvenréttindafélagsins; hún vilji svo gjarnan fá
Kvenréttindafélagið inn í samtökin og vonist til þess að svo geti
orðið í Lundúnum.99 Og til að hnykkja enn frekar á því hve Ísland
væri mikilvægt fyrir alþjóðasamtökin virðist Johanne Münter hafa
sent Bríeti 20 krónur, en tillagið til alþjóðasamtakanna var um 18
krónur. Johanne lét einnig umsóknareyðublað í alþjóðasamtökin
fylgja með og hvatti Bríeti eindregið til að sækja um inngöngu.100
Bríet reyndi að verða við óskum þeirra Chapman Catt og Münter
um stofnun landssamtaka, svo sem sjá má af ferðalagi hennar um
landið og skrifum um efnið í Kvennablaðið. Ýmsum konum þótti þó
nóg um og leist ekki á skipulag hins fyrirhugaða landsfélags, einkum
vegna þess að Reykjavíkurfélagið átti að verða móðurfélagið.101
Eftir Bríeti liggur uppkast að bréfi þar sem hún sagði að Kven -
réttindafélagi Íslands hefði ekki gengið til „valdafíkn eða drottn -
unar girni“ að ætlast til að félagið í Reykjavík væri aðaldeild.102 Lög
sambandsins voru sniðin eftir sænsku landssamtökunum og verður
ekki annað séð en Bríet hafi haft nokkuð fram að færa í þessum efn-
um. Hins vegar má sennilega finna að frammistöðu hennar við að
kynna málstaðinn og leiðrétta þann misskilning sem upp kom um
skipulagið. Niðurstaðan af þessum deilum varð sú að þrjár deildir
lifðu á landsbyggðinni, á Ísafirði, Blönduósi og Sauðárkróki. Sam -
bandið var stofnað formlega í júní 1910 og það gekk í IWSA á þing -
inu í Stokkhólmi árið 1911 sem sjálfstætt félag.
„mér fannst eg finna sjálfa mig …“ 67
98 Félagið sem Carrie Chapman Catt vísar til er án efa félag það er Margrét J.
Benedictsson stofnaði ásamt fleiri konum í Winnipeg árið 1908 (sjá Freyja, 10.
árg., 6.–7. tbl., bls. 181. Margrét var fyrsti formaður þess og ritari. Hún komst
hins vegar ekki til Amsterdam.
99 Lbs. 3609 4to (Bréfasafn Bríetar Bjarnhéðinsdóttur). Carrie Chapman Catt til
Bríetar Bjarnhéðinsdóttur 29. desember 1908.
100 Lbs. 3596 4to (Bréfasafn Bríetar Bjarnhéðinsdóttur). Johanne Münter til Bríetar
Bjarnhéðinsdóttur 14. janúar 1910.
101 Lbs. 3608 4to (Bréfasafn Bríetar Bjarnhéðinsdóttur). Kvenrjettindafjelag Akur -
eyrar til Bríetar Bjarnhéðinsdóttur 9. febrúar 1909.
102 Uppkast að bréfi, ódagsett. Lbs. 3608 4to (Bréfasafn Bríetar Bjarnhéðins dóttur).
Saga vor 2012_Saga haust 2004 - NOTA 10.5.2012 12:39 Page 67