Tímarit Máls og menningar - 01.10.2016, Page 52
52 TMM 2016 · 3
H va ð e r í s l e n s k u r r i t h ö f u n d u r ?
„Þau eru stundum svo andstyggileg …“ segi ég loksins. Blíð, há, sorgmædd,
kjánaleg hljóð. Augu okkar mætast. Annað parið uppfullt af undrun.
„Hvað áttu við?“ spyr hann með blíðu brosi. „Fólk? Íslendingar? Viðskipta-
vinir?“ og þegar hann segir „karlmenn?“ endurspeglar andlit hans sárs auka
minn.
„Það spyr þig þó einhver,“ segir hann. „Heldur þú að einhver hafi áhuga á
því að ég sé frá Bíldudal, ha? Er einhver að spyrja mig hvernig mér gangi með
íslenskuna, hvort ég sakni fjölskyldunnar eða hvað mér finnist um Ísland?
Trúðu mér, vinan, það er betra að vera útlendingur á Íslandi en sveitamaður
í Reykjavík.“ Sárt bros. Ég nötra eins og salatbar.
„Æ!“ Hann lítur á mig og breiðir út faðminn.
En hver erum við eiginlega? Tveir þjónar í miðri þvögu af huggulegu og
hungruðu fólki. Einhver er að bíða. Hann bendir á barinn.
Ullarkjóll og leðurjakki. Grátt og svart. Íslendingar. Ég bægi burt tárunum
og fer fram að heilsa þeim. Rödd Óla fyrir aftan mig stöðvar mig.
„Hvað sagðirðu? Viltu segja þetta aftur?“ Ég sný mér við. Hann glottir.
„Hvað sagðirðu?“ spyr hann.
Parið lítur á okkur. Karl og kona á fimmtugsaldri. Konan hallar undir
flatt. Maðurinn brosir vingjarnlega. Þau eru forvitin. Ég er steinrunnin.
Hann er svipbrigðalaus trúður.
„Þetta síðasta. Ég heyrði ekki í þér, vinan. Svaraðu nú fyrir þig.“
Hann leggur hönd upp að eyra með ýktu látbragði. Með fullkominni
líkamsbeitingu, hlýjum augum og vinalegu fasi er hann fyrirmyndarþjónn.
Hann er leiðarvísir um fullkomna mannasiði.
„Segðu það!“ leggur hann fastar að mér.
Parið beinir nú sjónum að mér.
Þau eru stundum svo andstyggileg.
Þau eru stundum svo andstyggileg.
Þau eru stundum svo andstyggileg.
„Góða-kvöldið-get-ég-aðstoðað?“ spyr ég með hrífandi brosi.
Takk fyrir komuna
Ég loka dyrunum á eftir síðustu gestunum
Takk fyrir komuna
Jafnvel þótt það sé ekkert vit í því
Takk fyrir komuna
Takk fyrir bælda reiði
Takk fyrir að kaupa hungur
Takk fyrir öll hin barnaheimilaheilkennin og sjálfsbjargarhæfnina
Takk fyrir vefengt siðferði
Takk fyrir ótta
Takk fyrir komuna
Takk fyrir kommúnismann