Hugur - 01.01.2014, Qupperneq 9

Hugur | 26. ár, 2014 | s. 9–21
Uppreisn gegn hefðinni
Ólafur Páll Jónsson ræðir við Gunnar Ragnarsson
Gunnar Ragnarsson hefur um langt skeið verið fastagestur á fyrirlestrum Félags
áhugamanna um heimspeki. En hann er líka flestum íslenskum áhugamönnum
um heimspeki kunnur af þýðingum sínum á verkum Davids Hume, Johns Stuarts
Mill, Johns Dewey og margra fleiri. Á aðalfundi félagsins vorið 2014 var Gunnar
gerður að heiðursfélaga í Félagi áhugamanna um heimspeki. Það var samdóma
álit stjórnar félagsins að framlag hans til íslenskrar heimspeki væri einstakt, og
þá ekki síst í því ljósi að Gunnar hafði aldrei fast starf sem heimspekingur. Þetta
var alltaf aukastarf – og í þeim skilningi áhugamennska – þótt Gunnar væri bæði
menntaður í greininni og ynni verk sín af fyllstu fagmennsku. Viðtali Ólafs Páls
Jónssonar við Gunnar, sem hér birtist, er ætlað að veita lesendum Hugar innsýn
í líf og störf hans.
Uppvöxtur og menntun
Við Gunnar Ragnarsson höfum mælt okkur mót á Kjarvalsstöðum. Við fáum okkur
kaffi og byrjum að spjalla. Ég spyr hann fyrst hvaðan hann sé. Hann segir mér að hann
sé fæddur árið 1926 og sé frá Lokinhamradal sem er yst á skaganum á milli Arnarfjarð-
ar og Dýrafjarðar. Það eru vafalítið fáir staðir jafn afskekktir og þessi dalur, en það var
ekki fyrr en árið 1974 sem þangað var lagður vegur. Þegar Gunnar ólst upp voru fjögur
býli í Lokinhamradal. Þau eru nú öll í eyði. „Ég fór kornungur að slá með orfi og ljá og
stunda sjóróðra á skektu og trillubát,“ segir Gunnar og heldur svo áfram. „Við vorum
með stórt fjárbú þar sem hverri kind var gefið nafn. Ég hafði engan áhuga á sauðfénu
og var afar ófjárglöggur. Hugsaði mér að verða skipstjóri þegar ég yrði stór!“ Gunnar
segir frá því að hann hafi átt auðvelt með að læra utanbókar og þegar hann hafi verið
14–16 ára hafi hann séð um að kenna yngri systkinum sínum. „Það var farkennari sem
kom þarna og var kannski tvo eða þrjá mánuði. En svo var ég látinn kenna yngri
systkinum mínum, það fékkst meira að segja samþykki skólanefndar til að ég kenndi
þeim svo farkennarinn þyrfti ekki að koma.“
Aðspurður um utanbókarnámið svarar hann:
Hugur 2014-5.indd 9 19/01/2015 15:09:30