Andvari - 01.01.2019, Blaðsíða 25

24 HJALTI HUGASON ANDVARI
kvekari og hafði átt þátt í að efla þá kirkjudeild mjög, m.a. með því
að stofna sérstakan guðfræðiskóla á hennar vegum, Earlham School of
Religion.66 Pétur notaði einnig tímann til að nema blaðamennsku sem
hann hafði mikinn áhuga á.67 Hann hafði enda hlotið nasaþef af faginu
með störfum við Kirkjublað föður síns.68
Eins og vænta mátti var íslenskur guðfræðingur kallaður til ýmiss
konar kirkjulegrar þjónustu meðal Íslendinga í Vesturheimi. Veturinn
1944–1945 hélt Pétur mánaðarlegar guðsþjónustur fyrir landa sína
í New York. Þá gegndi hann afleysingarþjónustu meðal Vestur-
Íslendinga í Winnipeg og Argyle í Manitoba sumarið 1945. Stríðið
setti mark sitt á dvöl Péturs og kirkjulegt starf hans í Vesturheimi en
hann átti þátt í að halda minningarguðsþjónustur um þau sem fórust
með Goðafossi 10. nóvember 1944 og síðar einnig Dettifossi.69 Við þau
tækifæri fékk hann forsmekk að því sem prestar geta fyrirvaralaust
staðið frammi fyrir og hann átti eftir að reyna á óvenju hastarlegan
hátt, þá nývígður prestur.
Pétur Sigurgeirsson kom heim úr Ameríkudvöl sinni snemma árs
1946 og hóf þá fyrir alvöru störf við Kirkjublaðið. Sigurgeir biskup
hóf útgáfu þess vorið 1943 og kom það almennt út mánaðarlega í dag-
blaðsformi til októberloka 1953. Sigurgeir hafði látist um miðjan mán-
uðinn og var þá helsti burðarstólpi blaðsins fallinn.70 Þótt Sigurgeir
væri alla tíð ritstjóri, eigandi og útgefandi blaðsins var greinilega
litið svo á að það væri málgagn kirkjunnar.71 Þegar á háskólaárunum
hafði Pétur lagt blaðinu til efni en þar skrifaði hann m.a. um vísitasíu-
ferðir föður síns sem hann tók oft þátt í.72 Ekki sagði hann heldur að
fullu skilið við blaðið meðan á námsdvölinni vestanhafs stóð.73 Má
sérstaklega benda á að í apríl 1946 fjallaði hann um kristilega æsku-
lýðshreyfingu í Bandaríkjunum — Youth for Christ — sem myndast
hafði um þekktan jazzleikara og predikara, Jack Wyrtzen (listamanns-
nafn John Von Casper Wyrtzen 1913–1996).74 Hefur þessi hreyfing
tvímælalaust vakið athygli Péturs og skilaði það sér síðar inn í safn-
aðarstarf hans á Akureyri. Þá er það í frásögu færandi að tíðindamað-
ur Kirkjublaðsins var einn Íslendinga í hópi fjölmargra blaðamanna í
Hvíta húsinu skömmu eftir að Harry S. Truman tók við forsetaemb-
ætti við lát Franklins D. Roosevelt.75 Störf Péturs Sigurgeirssonar við
Kirkjublaðið urðu öllu umfangsmeiri og formlegri eftir heimkomuna.
Fyrsta forystugrein hans birtist í maí 1946 en þá stóðu kosningar til
Alþingis fyrir dyrum. Bar greinin yfirskriftina „Hvern ætlar þú að