Andvari - 01.01.2019, Blaðsíða 43

42 HJALTI HUGASON ANDVARI
Péturs í Bandaríkjunum eins og gilti um ýmislegt annað í þeim starfs-
háttum sem hann innleiddi á Akureyri. Einnig var þó byggt á fyr-
irmyndum frá Kanada sem hann kynntist síðar þótt alltaf hafi þurft
að staðfæra hugmyndirnar að innlendum aðstæðum.166 Má eflaust
skoða kirkjuvikurnar á Akureyri sem eina af fyrirmyndum þess lista-
og menningstarfs sem nú er stundað m.a. með kirkjulistahátíðum í
Hallgrímskirkju, á Seltjarnanesi og víðar.
Eins og fram er komið þjónaði Friðrik J. Rafnar við Akureyrarkirkju
til 1954. Kristján Róbertsson (1925–2008) tók við af honum og þjónaði
til 1960. Þá kom Birgir Snæbjörnsson (1929–2008) til starfa á Akureyri
og þjónaði eftir það við hlið Péturs uns hann tók við biskupsembætt-
inu.167 Friðrik var af léttasta skeiði og átti við heilsubrest að stríða
meðan þeir Pétur þjónuðu saman. Takmarkaði það hlut hans í fjöl-
breyttu safnaðarstarfinu. Hann var þó áhugasamur og hvetjandi í því
efni. Yngri prestarnir tóku aftur á móti fullan þátt í starfinu.168 Þeir
komu þó ekki til starfa á Akureyri fyrr en eftir að mesta mótunartíma-
bilinu var lokið. Það er því raunhæft að eigna Pétri að langmestu leyti
þá miklu byltingu í starfsháttum kirkjunnar sem fram fór á Akureyri
allt frá upphafi prestsþjónustu hans þar.
Safnaðarstarfið á Akureyri var þó ekki borið uppi af prestum einum.
Þvert á móti má segja að Pétur Sigurgeirsson hafi orðið einna fyrstur
manna til að ógna prestakirkjunni sem hér starfaði um það leyti sem
hann hóf störf og hefur raunar enn ekki látið verulega undan síga.169
Hann var óhræddur við að kalla safnaðarfólk til starfa á hinum ýmsu
sviðum kirkjulífsins og veita því svigrúm til athafna og ákvarðana.
Virkni almenns safnaðarfólks („leikmanna“) var því án efa meiri á
Akureyri en víðast annars staðar á landinu. Í hirðisbréfi sínu (sjá aftar)
tók Pétur þetta atriði sérstaklega til umræðu og leit þá svo á að besta
leiðin til að virkja fólk í kirkjunni væri að fela því ábyrgð.170 Sem
formaður Prestafélags hins forna Hólastiftis beitti Pétur sér líka fyrir
stofnun leikmannaskóla sem ætlað var að styrkja og styðja áhugasama
trúnaðarmenn safnaðanna í hlutverkum sínum.171 Sumarið 1977 var
haldið námskeið á Hólum fyrir kirkjufólk um ýmsa þætti í safnaðar-
þjónustu og árið eftir fyrir organista og presta um sameiginleg hlut-
verk þeirra. Voru jafnvel uppi áform um fastan lýðháskóla á vegum
kirkjunnar á Hólum en slíkur skóli starfaði í Skálholti frá 1972. Á
þessum sama vettvangi voru tekin saman drög að erindisbréfum fyrir