Andvari - 01.01.2019, Blaðsíða 32

ANDVARI SÉRA PÉTUR SIGURGEIRSSON 31
átti sóknarprestur að minnast aðstoðarprests í predikun sinni fyrsta
helgan dag eftir komu aðstoðarprestsins í kallið. Hann átti svo að
flytja fyrstu predikun sína næsta helgan dag þar á eftir.107 Í forföll-
um Friðriks J. Rafnar annaðist einn sóknarnefndarmanna, Brynleifur
Tobiasson (1890–1958) menntaskólakennari, þessa kynningu.108 Má
líta á það sem táknrænan atburð að óvígður fulltrúi safnaðarins leiddi
Pétur með þessum hætti inn í prestsþjónustuna, en hann átti eftir að
beita sér verulega til að auka veg óvígðra í kirkjunni bæði sem prestur
og biskup.
Ýmis embættisverk biðu nývígða prestsins eins og oft er, hafi þjónusta
verið skert í jafn fjölmennum söfnuði.109 Ekki leið heldur á löngu áður
en Pétur hlaut þá eldskírn í starfi sem fullyrða má að fáir prestar hér á
landi hafa reynt á fyrstu mánuðum sínum í starfi. Í lok maí 1947 varð
mannskæðasta slysið í íslenskri flugsögu er orðið hefur innanlands.110
Þá fórst Douglas DC-3 flugvél Flugfélags Íslands með einkennisstaf-
ina TF-ISI í Hestfjalli við Héðinsfjörð. Allir sem í vélinni voru fórust,
21 farþegi og fjögurra manna áhöfn.111 Það kom í hlut Péturs að til-
kynna aðstandendum um atburðinn og annast sálgæslu þeirra sem voru
á Akureyri. Þá stóð hann fyrir athöfn á Torfunefsbryggju er komið var
með jarðneskar leifar þeirra sem fórust til Akureyrar en mikið fjölmenni
hafði þá safnast saman við höfnina. Líkunum var síðan komið fyrir í
kapellu kirkjunnar.112 Jafnframt var í kirkjunni fjölmenn minningarat-
höfn um þau þrettán sem flutt voru til Reykjavíkur með varðskipinu
Ægi.113 Enn var þá ólokið viðhafnarmikilli útför þeirra tíu sem jörðuð
voru frá Akureyrarkirkju og grafin í kirkjugarðinum á Höfðanum. Tvær
úr hópi farþeganna sem voru frá nágrannabyggðarlögum Akureyrar
voru jarðaðar í heimasóknum sínum.114 Við þessar athafnir naut Pétur
vissulega nærveru og aðstoðar reyndari nágrannapresta.115 Mest hlaut
þó að mæða á honum sem staðarpresti. Þessir atburðir allir settu mjög
svip sinn á bæjarlífið á Akureyri þessa vordaga og reyndu á samstillt
átak margra. Meðal annars var ekki auðvelt að afla nægilega margra
líkkistna á svo skömmum tíma sem úr var að spila.116
Akureyringar minntust auðvitað þessara atburða lengi og mér er í
barnsminni hve eldra fólk dáðist að presti sínum fyrir framgöngu hans
þessa döpru daga er hann gekk á milli þeirra sem um sárast áttu að
binda. Er ljóst að margir hafa fylgst með Pétri á þessum ferðum hans
með samhug en jafnframt forvitni um hvort hann reyndist vandanum
vaxinn. Aldrei varð ég annars var en að hann hefði verið talinn stand-