Andvari - 01.01.2019, Page 26

ANDVARI SÉRA PÉTUR SIGURGEIRSSON 25
kjósa?“ Þar fléttaði höfundur saman vangaveltur um sannan andlegan
auð, komandi kosningar og viðfangsefni stjórnmálanna sem að hans
mati fólust í að „[…] styrkja það sem styrkja þarf og stjórna því sem
stjórna þarf […]“.76 Varð Pétur eftir þetta iðinn leiðarahöfundur. Meðal
nýjunga í blaðinu eftir heimkomu hans má nefna að 20. tölublað fjórða
árgangs sem kom út í lok október 1946 var tileinkað „skólaæskunni
í landinu“ og voru þá helstu áhersluatriðin prentuð hárauðu letri. Má
þar ugglaust sjá fingraför blaðamannsins Péturs. Einnig er ljóst að þá
þegar var áhugi hans á æskulýðsmálum vakinn. Einkum voru það þó
skólastjórnendur sem höfðu orðið og tjáðu sig um mikilvægi trúarinn-
ar fyrir skjólstæðinga sína. Gætir þar óneitanlega forsjárhyggju sem
braut í bága við þá stefnu sem Pétur fylgdi síðar í safnaðarstarfinu á
Akureyri.
Í Kirkjublaðinu 24. febrúar 1947 segir svo frá prestsvígslu Péturs
Sigurgeirssonar daginn áður og eru honum við það tækifæri þökkuð
ágæt störf í þágu blaðsins að undanförnu.77 Torvelt er að meta hlut
Péturs í Kirkjublaðinu með fullri vissu þar sem mikill hluti efnisins er
ekki merktur neinum höfundi. Þó er ljóst að Pétur og Sveinn Víkingur
(1896–1971) biskupsritari unnu einkum að blaðinu í umboði biskups.78
Með hliðsjón af aldursmun þeirra, mismunandi mótun, ólíkum áhuga-
sviðum og stíl má þó oftast álykta um hvor heldur um pennann.
Prestskapur á Akureyri
Eins og kom fram í upphafi þjónaði Pétur Sigurgeirsson öll prest-
skaparár sín á Akureyri. Um þær mundir sem Pétur flutti þangað var
Akureyri með áhugaverðustu prestaköllum landsins fyrir þann sem
ástunda vildi nýjungar í safnaðarstarfi. Það var fjölmennasta þétt-
býlisprestakallið utan höfuðborgarsvæðisins og söfnuðurinn nægilega
fjölmennur til að bjóða þar upp á öflugt guðsþjónustu- og félagslíf. Á
Akureyri voru því fjölþættari starfsmöguleikar en buðust í flestum
öðrum prestaköllum landsins. Þá hafði ein veglegasta kirkja landsins
verið vígð þar fáum árum fyrr og skapaði hún verðugan vettvang fyrir
blómlegt starf. Svo mikið er víst að Pétur hafði fengið augastað á kall-
inu um það leyti sem hann kom frá Ameríku.79 Hér á eftir verður gerð
grein fyrir því fjölbreytta þróunarstarfi sem Pétur ástundaði í höfuð-