Andvari - 01.01.2019, Qupperneq 41

40 HJALTI HUGASON ANDVARI
anum, auk trúarjátningarinnar sem var nýlunda meðan helgisiðabókin
frá 1934 var enn í notkun. Þá voru í fyrstu útgáfunni rúmlega 50 sálm-
ar og söngtextar með nótum sem hæfðu í unglingastarfi, auk úrvals úr
Davíðssálmum. Þar var einkum um sálma og lofsöngva að ræða en síðar
skyldi bæta annars konar söngvum við og urðu þeir alls 80 í síðari út-
gáfum. Markmiðið með bókinni var að hvetja sem allra flesta til virkrar
þátttöku í guðsþjónustunni sem jafnframt skyldi löguð að forsendum
ungmenna. Pétur átti sjálfur einn texta í bókinni, „Hér ríkir himneskur
friður“. Lýsti hann tilurð hans svo að þau Sólveig, eiginkona hans, hafi
verið viðstödd guðsþjónustu í Frúarkirkju í Kaupmannahöfn. Eftir mess-
una gekk fólk um kirkjuna, m.a. fram til hinnar miklu Kristsmyndar
Bertels Thorvaldsens yfir háaltarinu. Meðal kirkjugesta var amerískur
unglingahópur og krupu þau hvert á eftir öðru við gráturnar til að leita
„augnsambands“ við frelsarann. Á meðan sungu hin lag sem höfðaði
mjög til Péturs og útvegaði hann sér óðar nótur hjá fararstjóranum og
orti sálminn heim kominn.162 Annað erindi söngsins vísar augljóslega
til Frúarkirkjunnar: „Í kórnum hjá krossinum stendur/Kristsmyndin og
ég sé/útréttar hans mildu hendur/helgandi þetta vé.“163 Þá var gefin út
hljómplata undir sama nafni og messubókin í samvinnu við plötuútgáf-
una Fálkann í Reykavík, kór MA og stjórnanda hans, Sigurð Demetz
Franzson (1912–2006), auk Hljómsveitar Ingimars Eydal (1936–1993).
Voru lög af plötunni töluvert spiluð í Ríkisútvarpinu, einkum í óska-
lagaþáttum. Þá kom og út platan Jólavaka. Þar var að finna nokkra
þekkta jólasálma í flutningi barnakórs frá Akureyri auk þess sem ung-
menni las jólaguðspjallið.164 Þess skal getið að um svipað leyti komu út
tvær hjómplötur með kór Akureyrarkirkju: Oss berast helgir hljómar
um jólin 1968 og Heims um ból tveimur árum síðar.165
Á föstunni 1959 komst sú venja á í Akureyrarprestakalli að halda
kirkjuviku með fjölbreyttum kvöldsamkomum þar sem óvígðir safnað-
armenn voru virkir í undirbúningi, skipulagningu og stjórn dagskrár-
innar. Eftir það voru slíkar vikur haldnar á föstunni annað hvert ár.
Kirkjuvikurnar hafa oftast hafist með venjulegri sunnudagsguðsþjón-
ustu en lokið með hátíðarmessu. Á miðvikudögum var svo löngum
kvöldmessa en fjölbreytt menningardagskrá hin kvöld vikunnar. Var
þar leitast við að virkja sem flestar listgreinar við hlið tónlistarinn-
ar sem ávallt skipar veglegan sess í kirkjustarfi. Tíðum komu um og
yfir 100 manns að dagskrá hverrar kirkjuviku og aðsókn var oft mikil.
Kveikjunnar að þessu kirkjulega menningarstarfi er að leita í reynslu