Andvari - 01.01.1937, Side 34

30
Fiskirannsóknir
Andvari
skýrslu mína 1898, bls. 68), en Grindvíkingar, sem ég
talaði við um þetta, voru hræddir um, að erfitt mundi
verða að halda lóðum og þó einkum netum föstum á
þenna hátt, sökum hinna hörðu og þrálátu strauma þar
í sjó; en vert væri að reyna það.
Úr því að ég minntist á hina stríðu og oft langvinnu
strauma (föll) i Grindavíkursjó (og víðar við S-strönd-
ina) vil ég spyrja: hafa þessi föll ekki lík áhrif á fisk
(sérstaklega þorsk), sem heldur sér við botninn úti á
miðum, eins og þau hafa á smáfisk (þorsk og ufsa) uppi
við land, inni í fjörðum, og ég oft hefi athugað: Þau,
að fiskurinn snýr sér upp í strauminn með snjáldrið
niðri við botn og sporðinn >á lofti* og heldur sér graf-
kyrr í þessum stellingum, án þess að líta við neinu agni
eða bráð, þangað til straumurinn linast eða hættir; þá
lifnar hann við (sama segja menn að hann geri við
fallaskiptin úti á miðum). Væri nú svo, þá ætti svona
einstreymisfall að gera fiskinn tregan til þess að taka
beitu eða ganga í net (ánetjast) meðan það stendur yfir
og þannig draga úr afla, dag eftir dag.
Ég brá mér einn daginn út í Staðarhverfi, til þess
að sjá bátabryggjuna, sem Staðhverfingar höfðu komið
sér upp sumarið áður. Hún er í s. n. Hvirflum, ekki
langt þar frá, er skip kongsverzlunarinnar lágu áður.
Hún er úr járnbentri steinsteypu, eins og vant er, 63
m löng, með >hné« á miðju, all-há, með skjólgarði fyr-
ir sunnanátt, og á að lengjast síðar um 20 m, svo að
hálf-afgirt höfn myndast milli hennar og hleinar og skerja
A- og N-vert við hana. Hún kostar c. 14 þús. kr., að
meðtaldri vör eða lendingu innan megin við hana. Hafa
heimamenn lagt töluvert fé í hana í vinnu sinni, sem á
að endurgreiðast með tekjum af bryggjunni. Fiskibátar