Skagfirðingabók - 01.01.1970, Page 47
ÞORKELL ÓLAFSSON
Hér á undan er þess getið, hversu séra Högna Sigurðssyni fara orð
um séra Þorkel í bréfi til Finns biskups: „... framkvæmdalítill er
hann í öllu verslegu...". Þetta hefur ekki verið ofsagt. Hin seinni ár
séra Þorkels á Hólum mæddu á honum skuldakröfur. Er auðsýnt, að
hann hefur lítill fjármálamaður verið. Árið 1795 átti að gera fjárnám
hjá honum. Var hann þá krafinn um 80 rd. verzlunarskuld. Þá bað
Sigurður biskup sýslumann að fresta því fjárnámi, svo að áður yrði
hægt að ná því fé, sem dómkirkjan og biskupsstóllinn ættu hjá stift-
prófasti. Ritaði biskup amtmanni um þetta 5. febrúar 1795. Eftir lát
Sigurðar biskups krafði Ólafur stiftamtmaður séra Þorkel um að gera
skil á reikningum Hóladómkirkju frá 1784 til (24. júní) 1799. En þau
reikningsskil drógust, þótt stiftamtmaður endurnýjaði kröfu sína oft.
Ritaði hann loks kansellíinu árið 1800. Kvaðst hann ekki fá kirkju-
reikningana frá séra Þorkeli og væri því smeykur um, að fé það, er
kirkjan ætti inni hjá honum, mundi ekki vera í sem allra tryggust-
um höndum. Ritaði þá kansellíið Stefáni amtmanni Þórarinssyni (17.
maí 1800) og bauð honum að láta gera skoðun á sjóði kirkjunnar hjá
séra Þorkeli, innheimta fé það, er kirkjan ætti hjá honum og setja
það allt í vörzlu áreiðanlegs manns.
Líklega hefur séra Þorkell fengið fregnir af því, sem gera átti, því að
hann flýtti sér þá um sumarið (5. ágúst 1800) að senda stiftamtmanni
kirkjureikningana (frá 5. okt. 1784—1799 incl.). Við skoðunargerð
þessa, sem Jónas Scheving sýslumaður framkvæmdi eftir boði amt-
manns, skírskotaði séra Þorkell til þess reiknings, er hann hafði sent
stiftamtmanni og kvaðst skjóta sér undir úrskurð hans, kansellísins og
konungs. Aðrar upplýsingar um reikningana fékkst hann ekki til að
gefa, hversu oft sem sýslumaður áminnti hann um það. Þá kynnti
sýslumaður sér fjárhag stiftprófasts. Kom í ljós, að hann átti aðeins
eina kú, tvo hesta, ellefu ær, auk nauðsynlegs klæðnaðar. Þótti ekki
gerlegt að taka þessar eignir af honum, því að hann mætti ekki neitt
af þeim missa.
Stiftprófastur afhenti sýslumanni innsiglaðan böggul, sem í áttu að
vera 476 rd. 89 sk. Svo ritaði amtmaður stiftamtmanni um þetta 18.
október sama ár og skýrði honum frá aðgerðum sínum. Stiftamtmaður
sendi honum 10. nóvember uppskrift af reikningi séra Þorkels. Sam-
45