Skagfirðingabók - 01.01.1970, Blaðsíða 204

SKAGFIRÐINGABÓK
í Lágubúð bjó Sigríður Jónsdóttir, hreppstjóra og dbrm. á Lauga-
landi á Þelamörk. Hún var ekkja eftir Jóhann Árnason kennara. Jó-
hann var Möðruvellingur, vel gefinn, en frekar heilsuveill, vann
annars ýmis störf til sjós og lands. Þau voru fátæk, því kennslan gaf
ekki mikið í aðra hönd í þá daga. Tvö ár bjuggu þau í Garðshorni,
er það hjáleiga frá Hofi, en fluttust þá að Lágubúð, og þar dó Jóhann.
Voru þá tvö börnin ófermd, en alls áttu þau fjögur börn. — Sigríður
hefur áreiðanlega verið falleg stúlka á sínum yngri árum, ég sá hana
ekki fyrr en hún var orðin fullorðin. Bar hún greinileg merki um sína
fyrri fegurð þrátt fyrir erfið lífskjör og slæma aðstöðu í lélegum húsa-
kynnum. Það mun hafa reynzt henni örðugt að búa við fátæktina, hún
var skapstór að eðlisfari og komin frá stóru og myndarlegu heimili.
Hún var snyrtikona hin mesta, og það var unun að sjá, hvað allt var
hreint og vel útlítandi á heimili hennar. Átti það einnig við um börn-
in, en tvö þau yngstu voru í skólanum í Bæ, greindar stúlkur og
myndarlegar.
í Löngubúð bjó Guðmundur Jónsson. Björg hét kona hans. Þau áttu
þrjú börn. Ekkert kynntist ég þeim og veit lítið um þau. Guðmund-
ur vann allt, sem til féll, bæði til sjós og lands. Þau fluttu síðan til
Siglufjarðar, og var Guðmundur verkstjóri um tíma hjá Sófusi Blöndal,
en hann hafði þá síldarsöltun.
í Liljukofa bjó ein kona, Lilja að nafni. Hún var með smávöxnustu
kvenmönnum, sem ég hef séð. Aldrei vissi ég, á hverju hún lifði, en
ýmsir urðu tii að rétta henni hjálparhönd. Kofinn var óvistlegur, og
inni voru fáir munir utan rúmfletið, sem hún svaf í, og hlóðir í öðrum
enda kofans. Einmanalegt hefur verið að búa þarna, ekki sízt á vetr-
um við grútarlampabirtu. Líf þessarar konu, sem var hljóðlát og mun
iítið hafa farið út nema til brýnustu nauðsynja, var sem lokuð bók,
en ef til vill hefur hún átt sína drauma eins og margir aðrir, drauma
sem aldrei rættust.
Eins og áður segir, var húsbóndi minn Einar Jóhannsson í Mýra-
koti. Einar var hár maður, mjög holdgrannur, léttur á fæti og vinnu-
samur, frekar kaldlyndur alvörumaður, sem sjaldan gerði að gamni
202