Skagfirðingabók - 01.01.2011, Blaðsíða 64

SKAGFIRÐINGABÓK
Halldórsstöðum í Bárðardal
Suður­Þingeyjarsýslu, 29. april 1931
Kæra frænka mín,
Fyrir fáum dögum fjekk jeg brjef frá Engilráð systur minni og þar inn­
aní lagt brjef frá þjer til hennar sem hún lofaði mjer að sjá, hún vissi að
það myndi gleðja mig.
Jeg er Jóhanna Helga Ólafsdóttir einþykka stelpan sem hvergi vildi
sofa nema hjá Steinku sinni sem jeg kallaði þig alltaf. Loksins loksins
eftir mörg og löng ár geta brjef farið á milli okkar og jeg fengið að vita
eitthvað um þig. Þráin eftir því hefir alltaf lifað í gegnum skin og skúr í
lífi mínu. Jeg man vel eftir þegar þú fórst þó jeg ung væri. Morguninn
eftir man jeg það að jeg vaknaði skælandi og spurði eftir þjér. Þá var mjér
fengið kort sem sagt var að væri frá þjér og sagt að þú kæmir bráðum en
það bráðum drógst lengi. Árin liðu og sorg mín breyttist úr skælum í
innibyrgðan söknuð. Oft fór jeg samt afsíðis og skældi ef minnst var á
þig. Jeg var komin undir fermingu þegar jeg hætti því.
Jæja elsku Steinka mín þetta brjef verður mjög stutt og ómerkilegt.
Jeg er veik sem stendur og ligg rúmföst svo skriftin er ekki glæsileg. Jeg
skrifa þjer langt brjéf seinna. Þetta er aðeins til að láta þig vita af mjér.
Engilráð systir mín er búin að skrifa þjer og hefir eflaust sagt þjér alt sem
þú spurðir um í brjefi þínu. Gaman væri að vera horfin til þín um aldur
og æfi.
Jeg er gift fyrir fáum árum en er barnlaus. Það er nú líklega djörf ósk
að hugsa sjér það að fara til Vesturheims en gaman væri það. Elsku
frænk a mín skrifaðu mjer og segðu mjer af högum þínum. Jeg bíð með
óþreyju eftir því.
Nú fer jeg að hætta, er svo mikill ræfill að skrifa nú, skal skrifa langt
brjef næst.
Utanáskrift mín: Frú Jóhanna Ólafsdóttir, Halldórsstöðum, Bárðardal,
Suður­Þingeyjarsýslu, Akureyri, Ísland.
Bréf frá Jóhönnu Ólafsdóttur til Steinunnar Gísladóttur
Jóhanna Helga Ólafsdóttir var fædd 17. desember 1894 á Dúki í Sæmundarhlíð. For-
eldrar: Ólafur Sæmundsson, f. 15. okt. 1863, d. 4. des. 1955, og Steinunn Steinsdóttir,
f. 29. des 1857, d. 29. okt. 1913. Jóhanna Helga giftist Katli Tryggva syni bónda á
Halldórsstöðum í Bárðardal. Þau voru barnlaus. Þau skildu. Jóhanna Helga og Steinunn
Gísladóttir voru systradætur.
64