Tímarit Máls og menningar - 01.12.2016, Blaðsíða 22

K r i s t í n Ó m a r s d ó t t i r
22 TMM 2016 · 4
Hvað meturðu minnst í fari manneskju?
Yfirgang, undirferli, sjálfsvorkunn, ósanngirni, grimmd gagnvart dýrum
og mönnum, ákveðna tegund af eigingirni.
Hver er uppáhaldsliturinn þinn og blóm?
Dýragras er bláa blómið mitt. Ég hugsa mikið um liti – það fer eftir tíma-
bilum hvaða litur er í forgrunni en almennt er blágrænn minn eftirlætislitur.
Sama gildir með blóm og fugla: eftirlætisblóm einkennir hvert tímabil og ég er
yfirleitt undrandi yfir því hvaða blóm verður fyrir valinu í undirvitundinni.
Nú er ég á milli blóma, bíð eftir næsta. Fjalldalafífillinn er mjög fallegur,
hann hafði merkingu fyrir mig fyrir þrjátíu árum og aftur núna. En nú vel
ég lambagrasið.
Uppáhaldsfugl?
Uglan hefur lengi verið minn fugl en nú finnst mér vera kominn tími til
að annar fugl taki við eða bætist við. Ég hélt lengi vel upp á krákurnar og
geri enn. Og alla smáfuglana á Íslandi, sérstaklega hrossagaukinn og spóann.
En nú langar mig til að velja mér nýjan fylgifugl, bíddu við. Rjúpan, krían
og lóan. Heyrðu, ég vel kríuna af því hún ver ungana sína svo vel og mig
langar til að tileinka mér meiri ákveðni. Annars var krían fylgdarfugl Ástar-
meistarans. Nei, ég held ég velji maríuerluna, uppgötvaði hana um daginn:
hún er hinn íslenski kólibrífugl, dansar í kringum hreiðrið. Svo heitir hún í
höfuðið á Maríu sem ég er nýbúin að uppgötva.
***
Ertu gift, í sambúð? Hvað heitir heimilisfélagi þinn ef ég má spyrja?
Nei, ég er ekki gift og ekki í sambúð. Seinna nafn núverandi heimilisfélaga
míns er fyrra nafn fyrrverandi heimilisfélaga míns og kærasta, Magnúsar
Guðjóns. 
Já einmitt, þú eignaðist þitt fyrsta barn í fyrravor. Hvað heitir sonur þinn?
Hvernig mótar hann líf þitt? Viltu segja mér frá fyrsta árinu í lífi þínu sem
móður?
Ævar Magnús Magnússon heitir sonur minn. Hann er ekki fylgi-
hnöttur minn, hann er sólin, ég er tunglið – hinn Pýþagóríski samhljómur
plánetanna finnst mér núna fyrst hafa merkingu. Ég get annars ekki lýst
þessum áhrifum, einhvern tíma mun ég reyna það. Dagbókaráráttan kom
upp í mér, mig langaði svo til að ná í orð þessari upplifun – þessari reynslu,
ævintýri – eftir fæðingu drengsins en ég gat lítið skrifað. Nema ljóð, meðan
ég hafði hann á brjósti var ég með glósubók til að punkta hjá mér og vann
að nokkrum verkum í huganum. Þvílík geðhrif – má ég grípa tækifærið og
hrósa oxítós-hormóninu, öðru nafni ástarhormóninu?