Orð og tunga - 2021, Síða 122

Orð og tunga 23 (2021), 111–136, https://doi.org/10.33112/ordogtunga.23.5
© höfundur cc by-nc-sa 4.0.
Ágústa Þorbergsdóttir
Staða íslensku á sviði fjármála
1 Inngangur
Viðfangsefni þessarar greinar er staða íslensku í fjármálaheimi. Greint
verður frá niðurstöðum rannsóknar sem gerð var árið 2019 um íðorð
í fjármálum þar sem ýmsir þættir voru kannaðir til að varpa ljósi á
stöðuna.
Tilgáta mín var sú að orðaforði á sviði fjármála hefði tekið miklum
breytingum og að erfitt væri að finna íslensk fjármálaíðorð. Í því
sambandi má benda á að efnahagslífið hefur verið í örri þróun og
mörg ný hugtök hafa komið með innleiðingu Evróputilskipana.
Önnur tilgáta var að á þessu sviði væri umtalsvert áreiti frá ensku. Hér
hef ég í huga að ný hugtök koma oftast í gegnum ensku og íslensk íð­
orð koma stundum of seint fram og ná ekki að festast í málinu.1 Þessu
til viðbótar virðist ljóst að enska krefst stöðugt meira olnbogarýmis
og allvíða hefur komið fram að færst hafi í vöxt að enska sé notuð sem
samskiptamál í íslenskum fjármálastofnunum.
Af þessum sökum taldi ég áhugavert að gera rannsókn á stöðu
íslenskrar tungu í fjármálaheimi sem tæki á ýmsum hliðum. Gerð var
könnun þar sem athugað var hvernig gengi að finna íslensk íðorð í
fjármálum, hvernig skráningu þeirra væri háttað og hver væru helstu
vandamál tengd íðorðum. Könnunin tók einnig á viðhorfum til
íslenskra íðorða og íðorðastarfs, áhuga á ókeypis aðgangi að traustum
og samræmdum íðorðabanka um fjármál og áhuga á að deila íðorðum
með öðrum. Þá var jafnframt kannað hvort enska væri samskiptamál
fremur en íslenska í íslenskum fjármálaheimi.
1 http://islenskan.is/images/Fundargerdir/Fundur­stjornar­Islenskrar­malnefndar­
i­Safnahusinu.pdf (sótt í ágúst 2020).
tunga_23.indb 111 16.06.2021 17:06:51