Orð og tunga - 2021, Qupperneq 138

Ágústa Þorbergsdóttir: Staða íslensku á sviði fjármála 127
Mynd 9. Svör við spurningunni hvort þýðingar íðorða skipti miklu eða litlu máli í
fyrirtækinu/stofnuninni.
Markmiðið með þessari spurningu var að fá álit þátttakenda á því hve
miklu máli þeir teldu þýðingar íðorða skipta á vinnustaðnum.5 Eins
og Mynd 9 sýnir telur mikill meirihluti þátttakenda eða alls 82,6% að
þýðingar íðorða skipti „mjög miklu“ eða „fremur miklu“ máli. Enginn
þátttakenda svaraði því til að íðorð skipti „fremur litlu“, „mjög litlu“
eða „engu“ máli. Þetta eru athyglisverðar niðurstöður þar sem fram
kom í kafla 4.1 að 45,5% svara því að engin skráning sé á íðorðum.
Ef niðurstöður eru skoðaðar eftir rekstrarformi, þ.e. eftir því
hvort um er að ræða fyrirtæki, stofnun eða þýðendur, þá má greina
nokkurn mun, þ.e. þá svara 83,3% þýðenda og 66,7% stofnana því
að þýðingar íðorða skipti „mjög miklu“ máli en aðeins 37,5% fyrir­
tækja. Þarna kemur í ljós að nákvæmni í meðferð íðorða skiptir
meira máli hjá þýðendum og stofnunum en fyrirtækjum sem sinna
minna íðorðastarfi. Dæmi um fyrirtæki í þessari könnun eru t.d.
tryggingafyrirtæki og endurskoðendur.
Í tíundu spurningu er spurt um viðhorf til íðorðastarfs í fjármálum.
5 Með orðalaginu „þýðingar íðorða“ var hér átt við mikilvægi þess að til væru ís­
lensk íðorð en ekki aðferðina við að mynda íðorðin, s.s. hvort íðorðin væru svo­
kallaðar tökuþýðingar.
tunga_23.indb 127 16.06.2021 17:06:52