Strandapósturinn - 01.06.1988, Blaðsíða 15

Stefán Gíslason,
sveitarstjóri Hólmavík
Fréttir
að heiman
1988
Þegar tveir menn hittast, bregst það sjaldan að annar spyr hinn
hvað hann segi í fréttum. Hinn segist þá segja allt ágætt, allt gott,
allt fínt eða allt svona sæmilegt, en útskýrir það helst ekki nánar.
Þar með er samtalinu oftast lokið, nema ef í kjölfarið fylgir stutt
úttekt á veðrinu og ríkisstjórninni. En hvað svo sem býr að baki
þessu dæmigerða samtali, er hitt víst, að mennirnir eru forvitnir í
eðli sínu og fýsir að vita hvað gerist í næsta húsi, fyrir sunnan eða
hinum megin á hnettinum. Ekki er ólíklegt að einhverja fýsi líka
að frétta af gangi mála á Ströndum, því verður reynt hér á eftir að
tína til nokkur atriði úr lífi og starfi Strandamanna á því herrans
ári 1988.
Árferði. Veturinn 1987—1988 var mildur og afar snjóléttur. Þó
kom vorið seinna en menn höfðu búist við og gróður tók fremur
seint við sér. Maímánuður var kaldur en áfallalaus. Töluverður
klaki var í jörðu eftir veturinn og gróður átti erfitt uppdráttar.
Júnímánuður einkenndist nokkuð af stórviðrum, en í júlí brá til
hins betra. Einkum var góð tíð í fyrri hluta júlímánaðar, en þá
skein sól dögum saman, og hiti fór varla niður fyrir 15°C í rúma
viku. Þegar leið á mánuðinn dró úr hitanum og úrkoma jókst.
13