Uppeldi og menntun - 01.09.2004, Síða 115

HRÖNN PÁLMADÓTTIR
Varanlegur í þema, eitthvað sem sést. Gaman að taka þátt í þessu og læra
sjálfur sköpun og möguleika.
Eftirfarandi orð Völu leiðbeinanda eru dæmigerð fyrir lýsingu á ólíkum hlutverkum
fullorðinna innan frjálsa leiksins og í hópstarfi:
Maður er að vona að þurfa ekki að skipta sér af í leiknum, en í þema er
maður meira að koma af stað umræðum, leyfa þeim að vinna verkefni og
svara spurningum.
Það er athyglisvert hversu jákvæð viðhorfin voru til hópstarfsins. Starfsfólki fannst
það hafa ákveðnu hlutverki að gegna og vann að afmörkuðu viðfangsefni sem leiddi
til sýnilegs afraksturs. Hópstarfið var í huga viðmælenda tengdara skólastarfi en leik-
urinn. Erfiðleikar í samskiptum komu síður fram en í frjálsum leik. Stjórnin er meira
í höndum hins fullorðna, ólíkt því sem er í leiknum. Starfsmaður er nálægur allan
tímann og hefur yfirsýn og betra tækifæri til að styðja við hvert og eitt barn og við
samskipti milli barnanna.
Samstarf
Samstarf var talið eitt af lykilatriðunum þegar rætt var um hvernig starfsfólk teldi sig
í stakk búið til þess að taka á málum þeirra barna í hópnum sem áttu við samskipta-
erfiðleika að glíma. Mikilvægt væri að ræða og samræma leiðir til að bregðast við
börnunum. Foreldrar væru mjög mikilvægir og gætu gefið upplýsingar sem ykju
skilning á hegðun barnanna.
Nokkrir þættir voru nefndir sem drógu úr gæðum starfsins með börnunum. Mikl-
ar mannabreytingar og óöryggi nýs starfsfólks hefði áhrif á börnin og það kæmist los
á alla starfsemina. Veikindi starfsfólks gætu valdið því að stundum væru deildir und-
irmannaðar. Þetta leiddi til þess að lágmarksstarfsemi væri rekin og það bitnaði helst
á þeim börnum sem þurfa mest á stuðningi hinna fullorðnu að halda.
Á deildarfundunum voru málefni barnanna rædd. Ef áhyggjur voru t.d. af hegðun
barna var lagt á ráðin um næstu skref. Ennfremur voru mál rædd sem tengdust sam-
starfi hinna fullorðnu. Rósa leikskólakennari orðaði það svo:
ég tók fyrir á deildarfundi um daginn að við yrðum að njóta samvistanna
við börnin í stað þess að vera að pirra okkur á smáhlutum. Líta á málin frá
öðrum hliðum og reyna að vera jákvæðari. Það var á tímabili komin þreyta
í okkur, ekki síður mig en aðra. Þetta smitar út frá sér og verður eins og
snjóbolti. Þetta er eitthvað sem alltaf þarf að minna á, vanda orðaval, bara
hugsa áður en við framkvæmum.
Björk leiðbeinandi lagði áherslu á að starfsfólk héldi uppi aga og samræmdi reglur
sem börnin ættu að fara eftir:
113