Skagfirðingabók - 01.01.2014, Blaðsíða 114

SKAGFIRÐINGABÓK
114
Menntaskólaárin
ÁRIÐ sem ég ætlaði mér að vera í sjötta
bekk Lærða skólans var mér boðið að vera
heimiliskennari á Setbergi í Hafnarfirði
hjá Jóhannesi gamla Reykdal. Hann átti
mörg börn og þau voru í skóla og gekk
misjafnlega. Hann vildi fá einhvern til að
halda í höndina á þeim. Þetta var mér mikil
og góð lífsreynsla. Þetta á ég eiginlega að
þakka Ólafi gamla Daníelssyni. Hann var
mikill stærðfræðingur og ágætur kennari
fyrir þá sem voru fljótir að grípa það sem
hann var að segja, en nennti ekki að skýra
út lengi ef menn skildu ekki. Fyrirfram var
hann vantrúaður á máladeildarmenn, að
þeir gætu nokkurn tímann lært stærðfræði.
Ég reyndist honum góður nemandi og
stóð mig alltaf vel í stærðfræði hjá honum.
Hann var Skagfirðingur að uppruna og
vissi um mínar ástæður. Ég hafði fengið
leyfi til að taka utanskólapróf upp úr
fimmta bekk en ætlaði mér að sitja í sjötta
bekk. Þá var Jón Jakobsson frændi minn
dauður og gat ekki lengur hjálpað mér. En
Ólafur þekkti Jóhannes Reykdal og gerði
mér boð hvort ég vildi taka þetta að mér.
Ég fengi engin laun en fæði og húsnæði og
þetta mundi ekki vera meira starf en svo
að ég hefði nógan tíma til að lesa undir
stúdentsprófið. Það reyndist svo vera en
þetta var stórt og fjölmennt heimili hjá
Jóhannesi og hann átti sand af börnum.
Kona hans var mikil höfðingskona. Ég
hafði nógan tíma til að lesa fyrir mig og
meira heldur en námsfögin. Ég notaði því
bókasafnið í Hafnarfirði. Þeir áttu nokkuð
gott úrval af Norðurlandahöfundum og
ég man að ég komst yfir að lesa Samlede
værker eftir Björnsson og Ibsen og fleiri
góða menn. Og þá komst ég á bragðið að
lesa Hamsun.
Ég tók stúdentspróf utanskóla vorið
1926, fékk svo styrki til utanfarar.
Annars hefði ég aldrei farið, það var alveg
vonlaust. Það var svo merkilegt eftir allan
þennan hlaupalestur, að ég fékk nokkuð
gott stúdentspróf. Til marks um það,
nákvæmlega sömu einkunn og Bjarni
Benediktsson sem þótti vera mikill
námsmaður og var auðvitað í skólanum
allan tímann. Við fengum báðir góða
fyrstu einkunn, en vorum ekki hæstir.
Ung hjón í Kaupmannahöfn nýgift 1936,
Grethe Kyhl fornleifafræðingur og ofursta-
dóttir, og Jakob Benediktsson sveitadrengur
úr Sæmundarhlíð, lærður í klassísum mið-
aldafræðum.
Eigandi myndar: Grétar Benediktsson.