Skagfirðingabók - 01.01.2014, Side 158

SKAGFIRÐINGABÓK
158
Trölli fluttur
NÆSTA VERKEFNI sleðans var einnig
flutningur á ferðaskála. Ferðafélag Skag-
firðinga hafði þá þegar byggt Ingólfsskála
í Lambahrauni við Hofsjökul og áform-
aði að byggja fleiri skála. Var einkum
horft til fjalllendisins milli Austur-
Húnavatnssýslu og Skagafjarðar. Um
svipað leyti og farið var að flytja hús
Svarfdæla, byrjuðu Skagfirðingar að
undirbúa að koma upp skála við Trölla-
foss, skammt norðan Tröllabotna. Hafist
var handa við smíðina haustið 1983
og á útmánuðum 1984 var hann klár
til flutnings. Skálasmíðinni stjórnaði
fyrrnefndur Friðrik A. Jónsson.
Nú þurfti að styrkja og breyta
sleðanum fyrir þennan skála, því hann
var nokkru stærri, efnismeiri og þyngri
en Tungnahryggsskálinn. Stýrði Sigurþór
því verki og komu þar allmargir smiðir við
sögu. Flutningurinn tókst vel, þótt ýmislegt
gengi á. Byrjað var á að koma sleðanum
með skálanum á upp á heimreiðina að
Kálfárdal föstudagskvöldið 9. mars, en
laugardagsmorguninn 10. mars var lagt
af stað. Óku þeir ýtunni til skiptis, Hjalti
Pálsson og Sigurþór Hjörleifsson. Heldur
var snjólítið fyrir sleðann en þó varð
enn frekar til trafala þíða í veðrinu sem
staðið hafði nokkra daga og gerði snjóinn
blautan og kraman. Sóttist ferðin hægt en
örugglega fram veginn að Kálfárdal, en
um klukkustundar töf varð við að breikka
sneiðinginn niður að Kálfárdalsánni. Eftir
það tóku við vegleysur, flóar og foröð en
snjór fór þó vaxandi. Mikill flokkur manna
Tungnahryggsjökull ofan Vesturdals 4. ágúst 1991. Í baksýn er hluti klettaveggjarins sem
kallaður hefur verið Tröllamúrinn. Á jökulskerinu lengst til vinstri sést Tungnahryggsskáli.
Dökki hluti skálans er viðbygging frá um vorið.
Ljósm.: Sigurjón Páll Ísaksson.