Tímarit Máls og menningar - 01.12.2016, Side 34

K r i s t í n Ó m a r s d ó t t i r
34 TMM 2016 · 4
Hver er hugmynd þín um (fullkomna) hamingju?
Ég hef aldrei verið spennt fyrir orðinu hamingja, vegna þess að því hefur
verið jaskað svo út. En takk fyrir að spyrja, nú er tími til kominn að svara
þessari spurningu. Og ég held að hugmynd mín sé svona: Að fá að njóta nær-
veru og gagnkvæmrar uppörvunar þeirra sem maður elskar mest, verandi
við góða heilsu, eigandi í sig og á og hafandi tíma og tækifæri til að skrifa
og gefa út og gleðjast svo yfir árangri erfiðis síns með nánustu vinum og
fjölskyldu. Ég sé fyrir mér að verið sé að skála í heitum skugga og hlæja og
borða geitaost. Það er ekki stríð, engin ógnarstjórn. Og nóg af hreinu vatni
að drekka fyrir börnin, mennina, konurnar og dýrin.
Hvað er það dýrmætasta sem þú átt?
Drengurinn minn. En auðvitað á ég hann ekki en hann er mér dýr-
mætastur. Nefni ég eitthvað sem ég á þá eru það dagbækurnar mínar. Ég var
lengi með þær í bankahólfi en þvælist með þær nú síðustu ár. Best ég fari að
koma þeim aftur í hólfið. Það er tómt fyrir utan myndir af hvítri geit með
svartri konu og Nietzsche með yfirvaraskeggið sitt.
Hver er mesta ást lífs þíns?
Drengurinn minn. Og dagbækurnar. Jú og nærfjölskylda mín og bestu
vinir.
Hvort finnst þér skemmtilegra að elska eða að vera elskuð?
Ég er nú svona heldur betri í því að elska en vera elskuð held ég, eins og
flestir. En er að reyna að læra að vera í jafnvægi.
***
Er öðruvísi að vera rithöfundur af kvenkyni en af karlkyni? Hver heldurðu
að sé munurinn á stöðu karl- og kvenhöfunda?
Það að taka sér vald höfundarins, að gera skriftir að ævistarfi, eiga karl-
menn auðveldara með útaf hefðinni og sögunni – það er bara svo. Ef kona
tekur sér þessa stöðu verður hún að setja sig í stellingar og óvíst hvort hún
leyfi sér það og fái leyfi til þess.
Hvernig finnst þér andrúmsloftið á Íslandi?
Skuggalegt. Spilling, siðleysi og skattaskjól. Þetta eru ekki bara smámál,
þetta eru aðalmál aldarinnar. Æ, já það eru svolítið margar frekjudollur
á ferðinni í íslenskum veruleika. Og ferðamennirnir, maður lifandi, við
eigum eftir að gera áætlun til framtíðar – enga stalíníska áætlun en áætlun
sem grundvallast á náttúruvernd. Og mannvernd. Barnavernd. Dýravernd.
Ljóðavernd.