Andvari - 01.01.2018, Blaðsíða 41

40 PÁLL SIGURÐSSON ANDVARI
gaf út nokkur rit eftir aðra höfunda með breytingum og viðaukum,
sbr. meðal annars Sifjarétt eftir Magnús Jónsson (3. útg. 1950). Hann
annaðist útgáfu nokkurra binda af ritinu Landsyfirréttardómar og
hæstaréttardómar í íslenskum málum 1802-1873 á vegum Sögufélags.
Í nokkur ár sat hann í ritstjórn safnritsins Nordisk domsamling og
einnig árum saman í norrænni samstarfsnefnd um útgáfu Tidsskrift
for rettsvitenskap. Hann annaðist jafnframt (1965) útgáfu ritsins
Erfðalögin nýju frá 1962 ásamt greinargerð fyrir lagafrumvarpinu og
reifun íslenskra dóma um erfðaréttarmál.
Síðasta bók Ármanns var stórvirkið Hjúskapar- og sambúðarréttur,
mjög efnismikið rit (1084 síður), er kom út á vegum Bókaútgáfunnar
Codex 2008, þegar höfundurinn var 89 ára að aldri. Við samningu og
frágang þessarar stóru handbókar naut Ármann mikilvægrar aðstoðar
laganema og annars ungs fólks, sem sýndi þar mikinn dugnað og ná-
kvæmni, en þegar hér var komið sögu var sjón Ármanns mjög farið
að hraka. Að sögn nákunnugra naut Ármann þess mjög að vera með
þessu unga fólki við bókarsmíðina – og það mat einnig félagskapinn
við hinn aldna höfund og átti með honum góðar og glaðværar stundir.
Ein ritgerð eftir Ármann birtist að honum látnum í fyrrnefndu
Heiðursriti hans (2010), og nefnist hún Upphaf borgaralegra hjóna-
vígslna á Íslandi.
Dómarinn
Þess var áður getið, að Ármann Snævarr var skipaður dómari við
Hæstarétt Íslands 1. maí 1972 og gegndi því embætti óslitið til 1.
nóvember 1984 eða í rúmlega tólf ár. Hann var kjörinn varaforseti
Hæstaréttar frá 1. janúar 1976 til ársloka 1977 og forseti Hæstaréttar 1.
janúar 1978 til ársloka 1979.
Starf hæstaréttardómara er í raun réttri kyrrlátt og með þeim hætti,
að einstaka dómarar tjá sig að jafnaði ekki opinberlega um einstök mál,
sem þar eru til meðferðar. Þeir tjá sig með dómunum einum. Rétturinn
er með sínum hætti lokuð stofnun þótt almenningur eigi að vísu að-
gang að áheyrendabekkjum í dómsölunum. Jafnhliða dómarastarfinu
stundaði Ármann stundakennslu í nokkrum mæli, bæði í Lagadeild og