Uppeldi og menntun - 01.09.2004, Síða 7

FRÁ RITSTJÓRA
Með þessu hefti lýkur 13. árgangi tímaritins. Frá og með næsta ári verða nokkur skil
í útgáfu þess. Hingað til hefur Rannsóknarstofnun Kennaraháskólans staðið ein að
útgáfunni, en stefnt er að því að grunnur hennar verði víkkaður. Nú standa yfir við-
ræður við uppeldis- og menntunarfræðiskor Félagsvísindadeildar Háskóla íslands
og kennaradeild Háskólans á Akureyri um aðild þeirra að útgáfu tímaritsins. Fljót-
lega upp úr áramótum verður gerð grein fyrir nýju fyrirkomulagi útgáfunnar.
Að þessu sinni birtast átta fræðilegar ritgerðir í heftinu. Athygli vekur að þrjár
þeirra fjalla um þroska og kennslu ungra barna. Nú þegar leikskólinn færist óðum
nær því að verða hluti af hinu almenna menntakerfi þjóðfélagsins, er vonlegt að
áhugi rannsakenda beinist í vaxandi mæli að honum sem og kennslu yngri barna í
grunnskóla. Að öðru leyti eru viðfangsefni höfunda fjölbreytt, allt frá menntun
nemenda með þroskahömlun til umfjöllunar um gildagrunn skólans.
Eins og boðað var í síðasta hefti, er nú opnaður í tímaritinu vettvangur, undir
heitinu Viðhorf, fyrir umræðu og skoðanaskipti um álitaefni í menntamálum. Að
þessu sinni beinist athyglin að fyrirkomulagi framhaldsnáms. Á síðari árum hafa
öðru hverju skotið upp kollinum hugmyndir og tillögur um að námstími til stúdents-
prófs verði styttur. Á vegum menntamálaráðuneytisins hefur raunar alllengi verið
unnið skipulega að því að móta tillögur í þessa veru. Nefnd um mótun menntastefnu,
sem Björn Bjarnason menntamálaráðherra skipaði 1994, lagði til að nám til stúdents-
prófs yrði stytt og í tíð eftirmanns hans, Tómasar Inga Olrichs, starfaði verkefnis-
stjórn um styttingu náms til stúdentsprófs. Verkefnisstjórnin hefur starfað áfram í tíð
núverandi menntamálaráðherra, Þorgerðar Katrínar Gunnarsdóttur, ásamt þremur
starfshópum sem skipaðir eru fulltrúum margra aðila. Niðurstöður af vinnu þeirra
birtust sl. haust í skýrslunni Breytt námsskipan til stúdentsprófs - aukin samfella í skóla-
starfi. Þorgerður Katrín Gunnarsdóttir varð góðfúslega við tilmælum ritnefndar Upp-
eldis og menntunar um að hún gerði grein fyrir þeim tillögum sem felast í skýrslunni
og stefnu ráðuneytisins í þessu mikilvæga máli. Jafnframt fékk ritnefnd þrjá einstak-
linga til þess að lýsa afstöðu sinni til málsins, einkum þess þáttar sem lýtur að stytt-
ingu náms til stúdentsprófs. Þessir einstaklingar eru: Björgvin G. Sigurðsson
alþingismaður, Katrín Jakobsdóttir MA í bókmenntum og Sölvi Sveinsson skóla-
meistari. Þess er vænst að sú umræða, sem hér er fitjað upp á, auðveldi lesendum að
glöggva sig á rökum málsins sem verður ugglaust ofarlega á baugi næstu misserin.
Sú ritnefnd sem lætur nú af störfum hefur haft hönd í bagga með útgáfunni síðast-
liðin tvö ár. Vil ég við þetta tækifæri þakka hinum mörgu samverkamönnum fyrir
ánægjulegt samstarf: ritnefndarmönnum, höfundum efnis, ritrýnum, prófarkalesara
og starfsmönnum Rannsóknarstofnunar, sem og Margréti Friðriksdóttur sem hefur
annast umbrot og uppsetningu. Óska ég þess að lokum að tímaritið eflist í framtíð-
inni sem vettvangur rannsókna og rýni á íslenskum uppeldis- og menntamálum.
5