Skagfirðingabók - 01.01.1982, Blaðsíða 12
FYRSTI ÞÁTTUR.
Hver eru takmörk Skagafjarðarsýslu á alla vegu?
Einn af þeim fjörðum, er skerast norðan í landið, heitir
Skagafjörður, og dregur nafn af nesi því, er liggur norður á milli
hans og Húnaflóa. Fram af Skagafirði liggur hérað allmikið, er
ber sama nafn, og myndar það, ásamt sveitunum beggja megin
fjarðarins, hið forna Hegranesþing, er nú er nefnt Skagafjarðar-
sýsla. Að norðan nær sýslan alls staðar að sjó fram, en að sunnan
fram á öræfi, allt suður að fjórðungamótum.* Að vestan greinir
hana og Húnavatnssýslu fjallgarður, er gengur sunnan úr
óbyggðum út i Deildarhamar, yzt á Skaga, fyrir vestan Skagatá.
Fjallgarður þessi hefur ekkert sérstakt nafn, en er kenndur við
sveitir þær eður jarðir, er land eiga að. Þannig er sá hlutinn, er
gengur norður eftir Skaganum, nefndur Skagaheiði. Nokkru
sunnar liggja Staðarfjöll, er svo heita, af því meginhluti fjall-
lendisins, um það bil, lýtur undir Stað í Reyninesi. Mælifell á og
allmikið land til fjalla. Fram og upp undan staðnum stendur
Mælifellshnjúkur, er hæst fjall er í þessum fjallgarði. Þar fyrir
framan liggur Hofsafrétt. Fjalllendi það, er liggur fyrir framan
byggð í Skagafirði, og takmarkar sýsluna að sunnan, er Hofs-
jökull, er öðru nafni heitir Arnarfellsjökull.
Að austan liggur Eyjafjarðarsýsla, og myndar takmörkin
fjallgarður, er gengur norður eftir nesi því, er liggur milli
Skagafjarðar og Eyjafjarðar, og endar við Almenningsnöf. Einn
hluti þessa fjallgarðs er Myrkárjökull, og nokkru norðar Una-
dalsjökull; liggja sýsluskilin fyrir austan hann.
Utan máls er ritað með annarri hendi: „. . . og suður í Hofsjökul".
10