Hugur - 01.01.2018, Síða 6

6
verkum Páls Skúlasonar í greininni „Eru stjórnmál í eðli sínu ósiðleg?“. Páll taldi
að sé litið á stjórnmál sem starfsgrein, eins og oft er gert, þá hljóti þau í eðli
sínu að vera undanþegin siðgæðislögmálum. Eina leiðin til að bæta siðferði innan
stjórnmála sé því róttæk hugarfarsbreyting gagnvart því hvað felist í stjórnmál-
um. Sigurður bendir hins vegar á að margar starfsgreinar lúti siðferðisboðum af
ýmsu tagi, þótt slík siðferðisboð stangist mögulega á við almenn siðgæðislögmál í
einstökum tilvikum. Stjórnmál séu þó sérstök að því leyti að vissir eiginleikar, sem
almennt teljast til siðferðislasta, teljist til dyggða innan stjórnmálanna. Sigurður
færir síðan rök fyrir því að það sé hlutverk almennings að veita stjórnmálamönn-
um aðhald til þess að þeir freistist ekki um of til að láta siðferðisboð stjórnmál-
anna sjálfra ráða för.
Eins og þessi upptalning ber með sér eru umfjöllunarefni greinarhöfunda mjög
fjölbreytt að þessu sinni. Hið sama er þó ekki hægt að segja um kyn höfundanna;
þeir eru allir karlmenn. Ritstjóri stjórnar því að sjálfsögðu ekki hverjir kjósa að
senda inn efni í Hug, en ég hafði það þó að sérstöku markmiði við val á þema
(„fordómar“) og í samskiptum mínum við væntanlega höfunda að stuðla að því
að sómi væri að kynjahlutfallinu í Hug 2018. Það mistókst hrapallega. Ef til vill
er það huggun harmi gegn að viðtalið og þýðingin eru að þessu sinni við og eftir
öfluga kvenkyns heimspekinga. Engu að síður er ljóst að það þarf að gera miklu
betur hvað þetta varðar. Hafi lesendur Hugar hugmyndir eða uppástungur um
hvernig megi bæta úr þessu, vil ég biðja þá um að koma þeim á framfæri við mig
sem ritstjóra (finnur.dellsen@inn.no).
Finnur Dellsén
Hugur 2018meðoverride.indd 6 24-Jul-18 12:21:20