Andvari - 01.01.2018, Page 11

10 PÁLL SIGURÐSSON ANDVARI
sagði kennarinn Ármann gjarnan til skýringar. Þetta er lykilsaga um átök til
stælingar og mótunar 2.
Við hátíðlega athöfn í Háskóla Íslands, er fram fór 26. júní 1993, var lýst
kjöri Ármanns Snævarr sem heiðursdoktors við Lagadeild Háskólans,
en á því ári varð deildin 85 ára. Á deildarfundi í þeirri háskóladeild
hafði nokkru fyrr, þ.e. 7. júní, tillaga um þessa heiðrun verið samþykkt
af hálfu deildarinnar. Við það tækifæri var lagður fram og samþykktur
„formáli að doktorskjöri“, eins og það heitir á háskólamáli. Hafði höf-
undur þessarar greinar samið þann texta að beiðni þáverandi deildar-
forseta, dr. Gunnars G. Schram prófessors, og var hann síðan tryggi-
lega festur inn í fundargerðabók deildarinnar, sem nú er varðveitt í
skjalasafni Háskólans. Formálinn hljóðar svo:
Ármann Snævarr er fæddur á Nesi í Norðfirði árið 1919. Hann lauk embættis-
prófi í lögfræði frá Háskóla Íslands árið 1944 en stundaði síðan framhaldsnám
við háskólana í Uppsölum, Kaupmannahöfn og Ósló næstu árin. Hann var
settur prófessor í lögfræði við Háskóla Íslands árið 1948 og skipaður árið
1950. Prófessorsembætti gegndi hann síðan til ársins 1972. Árið 1960 var
hann kjörinn rektor Háskóla Íslands og gegndi hann því embætti um níu ára
skeið. Allt frá fyrstu kennsluárum sínum átti Ármann Snævarr mikinn þátt í
endurmótun lagakennslu, og á embættisferli sínum sem háskólarektor hafði
hann forgöngu um ýmis nýmæli, sem reyndust Háskóla Íslands heillarík.
Höfuðkennslugreinar Ármanns Snævarr voru lengst af sifja-, erfða- og per-
sónuréttur og refsiréttur auk almennrar lögfræði, sem hann kenndi fyrri hluta
kennsluferils síns, en þá grein lögfræðinnar mótaði hann frá grunni miðað við
íslenskar aðstæður. Hann örvaði samskipti og félagslíf námsmanna og kom á
stúdentaskiptum við erlenda háskóla. Árið 1972 var Ármann Snævarr skip-
aður dómari við Hæstarétt Íslands og gegndi hann því embætti fram til ársins
1984, er honum var veitt lausn frá því fyrir aldurs sakir. Forseti Hæstaréttar
var hann árin 1978 og 1979. Ármann Snævarr hefur gegnt margvíslegum
félagsstörfum og átt farsælan þátt í stofnun mikilvægra félaga. Nægir þar
að nefna Bandalag háskólamanna og Lögfræðingafélag Íslands, en í báðum
þessum félögum sinnti hann lengi stjórnarstörfum. Formaður Íslandsdeildar
norrænu lögfræðingaþinganna hefur hann verið síðan 1972 og fyrr og síðar
lagt mikinn skerf til gagnkvæmra kynna og samstarfs norrænna lögfræðinga.
Ritstörf Ármanns Snævarr um lögfræðileg efni eru mikil að vöxtum. Hafa
þau markað spor á þróunarbraut íslenskra lögvísinda um áratuga skeið og
mörg hver lengi verið notuð við lagakennslu. Fyrir fáum árum birti hann m.a.
vandaðar útgáfur mikilla rita um almenna lögfræði og erfðarétt, sem bæði
eru grundvallarrit á þeim sviðum. Er sá maður vandfundinn, sem lagt hefur
drýgri skerf til íslenskrar lögfræði á þeim 85 árum, sem nú eru liðin frá því að