Andvari - 01.01.2018, Qupperneq 46

ANDVARI ÁRMANN SNÆVARR 45
Ármann var gistiprófessor við Uppsalaháskóla 1969-1970, við Ohio
Northern University 1971 og 1972 og við McGeorge School of Law í
Sacramento í Kaliforníu 1976. Fyrirlestra flutti hann, auk norrænna
háskóla, í Kanada, Þýskalandi og Rússlandi. Hann lét sig mjög varða
norrænu lögfræðingaþingin, sem haldin eru á nokkurra ára fresti og
var þar helsti fulltrúi Íslands um árabil og hélt hvað eftir annað fram-
söguerindi á þeim vettvangi sem og á mótum norrænna laganema (þar
sem hann flutti að minnsta kosti níu framsöguerindi). Samveran við
hina ungu laganema á þessum þingum þeirra var Ármanni einkar kær
enda naut hann sín hvergi betur en innan um ungt og fjörugt fólk. Í
stjórn Íslandsdeildar norrænu lögfræðingaþinganna var hann í meira
en fjóra áratugi, þar af formaður í 21 ár. Hann átti sæti í dómnefndum
um doktorsritgerðir (þar sem hann var stundum andmælandi) og pró-
fessorsembætti, þar á meðal við Árósaháskóla, Óslóarháskóla og há-
skólann í Cambridge (þar sem hann var einnig andmælandi). Hann var
um langt skeið fulltrúi Íslands í ýmsum nefndum, er varða norræna
lagasamvinnu, allt frá 1962, og lengi sat hann í norrænu hegningar-
laganefndinni. Þá var hann í fyrstu stjórn samtaka háskólarektora í
Evrópulöndum, og átti sæti í stjórn Árnastofnunar í Kaupmannahöfn
1969-1973.
Alveg sérstaklega lét Ármann sig varða samskiptin og tengslin við
lagadeild Ohio Northern University, sem hann kom á haustið 1960.
Á vormisseri það ár hafði prófessor Eugene N. Hanson, forseti laga-
deildar þess háskóla, dvalist hér á landi sem gistiprófessor á vegum
Fulbright-stofnunarinnar. Munu þeir Ármann hafa stofnað til vináttu
og samvinnu á þeim tíma og fylgdu síðan í kjölfarið nær árlegar og
gagnkvæmar heimsóknir laganema frá þessum tveimur háskólum, sem
enn standa, fjölda íslenskra laganema til gagns og ánægju. Kennarar
frá Ohio Northern University hafa einnig hvað eftir annað heimsótt
Lagadeild Háskóla Íslands. Í Sögu Orators segir um þetta:
Prófessor Hanson og kona hans hafa sýnt íslensku laganemunum mikla gest-
risni með því að bjóða þeim að búa á heimili þeirra þann tíma, sem heim-
sóknin hefur varað. Með þessu sambandi hafa tugir íslenskra laganema átt
þess kost að kynnast bandarískri lögfræði og öðlast nokkra innsýn í banda-
rískt þjóðfélag. Hefir þetta verið stórkostlegt tækifæri til að víkka sjóndeildar-
hringinn. [Þessi löngu samskipti eru] fágæt að því er varðar tengsl bandarískra
lagadeilda við evrópska háskóla og einstæð að því er tekur til skipta þeirra við
norræna laganema. 28