Andvari - 01.01.2018, Qupperneq 112

ANDVARI SOFFÍA GUÐLAUGSDÓTTIR LEIKKONA 111
úr herberginu og þetta yrði hennar síðasta. Þá sér hún að í einu horni stendur
kona og starir á hana og ávarpar þessum orðum: „Lady Macbeth“.
Eftir það hægist um en hjartsláttur Aðalbjargar var svo ör, að hún sagðist
ekki hafa sofnað aftur fyrr en um miðja nótt.
Þetta þóttu nokkur tíðindi og var sent svohljóðandi skeyti til Reykjavíkur:
Frú Soffía Guðlaugsdóttir leikkona
Kirkjustræti 10, Reykjavík.
Þú komst. Í hvaða gervi?
Síðdegis hringdi svo Soffía austur og kvaðst hafa hugsað til Aðalbjargar laust
fyrir miðnætti og kom það heim og saman við upplifun Aðalbjargar. Hins
vegar hafði Soffía séð sig fyrir sér í allt öðru hlutverki. Hinu má kannski
bæta við, að um líkt leyti var skoska leikritið leikið í útvarpi og hlutverk frú
Macbeth hefði vitanlega hæft Soffíu mjög vel, en annarri leikkonu var falið
það.
En ekki er allt búið. Sonur þeirra Soffíu og Hjörleifs, Guðlaugur, mikill
áhugamaður um íslenska leiklistarsögu og framgang Leiklistarsafns Íslands,
fól mér ýmis gögn frá móður sinni og er þar mikinn fróðleik að finna. En
nokkrum mánuðum eftir það hringdi Guðlaugur í mig og sagði mér að hann
hefði í viðbót fundið dularfullt skeyti frá Laugarvatni sem hann botnaði
ekkert í. Þar var þá komið skeytið góða og sagan sönn nema að því leyti að
skeytið barst einum degi síðar en var í minni mínu.