Goðasteinn - 01.09.1963, Qupperneq 37

nýja akveg og notið ferðarinnar í ríkum mæli, því að útsýni er
frábærilega fagurt þar efra.
Með tilkomu þessa vegar hefur opnazt þarna ný og mjög
skemmtileg leið í Þórsmörk. Margir hafa líka lagt land undir fót
og farið þenna fjallveg. Er þá ekið eins langt og komast má inn á
Skógaheiði og síðan haldið áfram gangandi yfir Fimmvörðuháls um
Heljarkamb niður Goðaland og í Þórsmörk. Er leið þessi fremur
auðveld fyrir kunnuga, en lítið má út af bera með veður og
skyggni, svo að göngumenn, sem lítt þekkja til staðhátta, hitti ekki
á beztu og greiðfærustu leiðina. Þess vegna ákvað flugbjörgunar-
sveitin að setja stikur á gönguleiðinni yfir Fimmvörðuháls og
niður á Goðaland. Var þetta þarfaverk framkvæmt á s.l. sumri
og verður hér lauslega sagt frá leiðangrinum, sem annaðist það.
Þriðjudagurinn 13. ágúst hafði verið ákveðinn tii fararinnar.
Rann hann upp bjartur og fagur, en með fremur kaldri norðan-
golu. Hvítur skýjamökkur þyrlaðist annað slagið suður yfir hátind
Eyjafjallajökuls. Ekki létu leiðangursmenn það aftra sér, enda
var útlit fyrir, að fjallabjart yrði um daginn. Lagt var upp frá
Skógum um níuleytið og vorum við sjö saman. Baldvin Sigurðsson
í Eyvindarhólum lagði til bifreiðina, Dodge-trukk einn mikinn, og
var ökumaður. Aðrir í förinni voru Sigurjón Sigurðsson, Eyvindar-
hólum, Þórhallur Friðriksson, formaður flugbjörgunarsveitarinnar,
Albert Jóhannsson, Þórður Tómasson, Jón R. Hjálmarsson, allir
frá Skógum, og Björn Júlíusson, læknir frá Reykjavík. Hann var
af tilviljun staddur í Skógum og fýsti að koma með. Var það ekki
nema sjálfsagt, því að vel þótti fara á, að læknir yrði með í svo
rnikilvægum fjallaleiðangri sem þessum.
Bifreiðin seig hægt og örugglega upp bratta sneiðingana frá
Skógum, og brátt var komið á heiðarbrún. Þar með var erfiðasti
hjalli þessarar ökuleiðar að baki. Af brúninni var fagurt um að
litast og þó einkum suður yfir Skógasand, þar sem heysæti stóðu
svo hundruðum og þúsundum skipti á iðgrænni sléttunni. Norð-
læg átt með góðum þurrki nokkra undanfarna daga hafði gert
Eyfellingum auðvelt að slá og hirða þessa tvö hundruð og þrjátíu
hektara nýræktar á örskömmum tíma. Vel sást til Péturseyjar,
Dyrhólaeyjar og fleiri fjalla í Mýrdalnum, en í suðri lá hafið
Godasteinn
35