Hlín - 01.01.1949, Blaðsíða 42
40
Hlín
mest kapp lagði liún á að gleðja sem flesta um jólin. Það
var hennar ein mesta jólagleði. Enda er svo fyrirmælt,
að úr sjóðnum verði veitt í desember ár livert, og fer
væntanlega fyrsta úthlutun fram fyrir næstu jól (1947). —
Það var áformað að veita fyrst úr þessum sjóði, þegar
hann væri orðinn 10 þúsund krónur, en hann hefur
vaxið svo ört, að hann mun vera orðinn 16 þúsund krón-
ur. — Auk þess, sem safnaðist strax, barst þessari sjóð-
stofnun happ að höndum fyrir tilstilli mætra forustu-
manna í Rangárþingi, sem höfðu ráð á nokkurri pen-
ingaupphæð til að gleðja með þurfandi fólk. Þeir kusu
að fylla þann flokkinn, sem vildu minnast 'Guðrúnar á
Lágafelli.
Það er ekki hátt fellið, sem þau Guðrún og Sæmundur
hafa gist, en það mun enginn Landeyingur bera brygður
á, að það hefur verið skjólgott undir því fyrir þá, sem
þangað hafa átt leið og allir mætt sömu hlýju viðtökunni.
Þegar litið er yfir farinn veg, sjer maður, hve mikil
ítök þessi kona átti í hugum samferðamanna sinna.
Minningarsjóður Guðrúnar á Lágafelli mun vekja og
glæða arineld mannúðar og velvilja, á því sviði, sem
hann nær til, og orna og auka birtu um ókornin ár og
aldir þeim, sem eru ljósvana í skammdegi lífsins. — Hjer
er svo fagurt fordæmi, að vel er þess vert að þeir, sem
landið erfa, veiti slíkri framkomu eftirtekt — og megi
læra af slíkum konum sem Guðrún á Lágafelli var.
Guðrún var jarðsett að Krossi í Austur-Landeyjum
28. september 1945, að viðstöddu fjölmenni.
Jeg, sem þessar línur rita, var fjarstaddur, gat ekki
sýnt þá samúð, sem jeg hefði gjarnan viljað gjöra — eða
lagt sveig að leiði liennar, en í þess stað eiga þessar línur
að vera, sem örlítill krans, sem vottur þakklætis og virð-
ingar til Guðrúnar fyrir alt hið góða, er hún og maður
hennar hafa sýnt heimili mínu um margra ára skeið.
í Guðs friði! í júní 1947.
Guðni Gíslason, Krossi í Landeyjum.