Tímarit Máls og menningar - 01.09.2014, Síða 91

N o k k u r Í s l j ó ð
TMM 2014 · 3 91
Álfkona sagði við son sinn:
„Ekki verða fyrir bíl
þegar þú ferð út að leika þér:
mennskir menn hafa nefnilega lagt akbraut
í kringum bæinn okkar!“
Þá svaraði álfabarnið:
„Af hverju gerast ekki mennsku mennirnir
ósýnilegir fyrir okkur
eins og við erum fyrir þeim?“
* * *
Ég óska þess að eiga öðruvísi bernsku:
taka lýsi á morgnana,
hlusta á Passíusálma í útvarpinu,
finna fyrir kláða af ullarnærfötum,
vinda úr blautum vettlingum,
á sumrin
liggja í tjaldi
einhversstaðar í Þingvallasveit.
Eða kannski svona:
horfa á Esju útum sexrúðuglugga,
bíða eftir haustskipi sem kemur með epli,
tala dönsku á sunnudögum.
Nei, frekar svona:
mig langar að hafa alist upp í torfbæ,
þarsem eru mold og mysa og orð;
og peysufatakerlingar spinna sögur ásamt ull,
og bætt er upp á matarskort með kvæðafjölda,
og napur vindur flettir blöðum.
Nei, frekar annað:
mig langar að hafa vaxið
úr stirðu landnámsgrasi
á öld þegar saga landvætta
hefur enn ekki verið þýdd
á mannamál skinnbókanna.
Kannski hefði ég átt að eiga öðruvísi bernsku.