Ritröð Guðfræðistofnunar - 01.01.2000, Blaðsíða 191
Invocavit prédikanir Lúthers
Ef ég teldi að yðar náð kjörfurstinn gæti og myndi vernda mig, færi ég ekki, því
sverðið hvorki á né getur hjálpað í svona málum.22 Guð einn verður að gera það,
án ráðgjafar og aðstoðar manna. Þar af leiðandi getur sá verndað mest sem trúir
heitast. Og þar sem ég hef þá tilfinningu að yðar náð kjörfurstinn sé enn nokk-
uð veikur í trúnni, get ég ekki litið á yðar náð kjörfurstann sem mann til að vernda
mig og bjarga mér.22
Lúther biður þá kjörfurstann að halda að sér höndum, hafa ekki áhyggjur og
að hlýða sínum yfirvöldum, enda væri annað uppreisn.24 Hér kemur því fram
djúpstætt traust Lúthers til Krists og trú á mátt orðsins, um leið og hann seg-
ir framgang fagnaðarerindisins ráða mestu um það að hann snúi aftur. Jafn-
framt fríar hann kjörfurstann ábyrgð á sér. Aðrar ástæður sem Lúther gefur
síðar fyrir heimkomunni eru þær: Að söfnuðurinn í Wittenberg hefur kallað
hann heim með bréfi, djöfullinn hefur haldið innreið sína í hjörð Lúthers í
Wittenberg og því þarf að bæta úr og loks er hann hræddur við uppreisn. Þá
þykir honum sem mannlegar þarfir hljóti að víkja fyrir málstað fagnaðar-
erindisins. Honum er fyrst og fremst hugað um sálir hinna kristnu. I öllu þessu
kemur skýrt fram meðvitund Lúthers um köllun sína.25
Lúther kom til Wittenberg þann 6. mars. Þremur dögum síðar hófst hann
handa við að róa lýðinn og koma reiðu á óreiðuna sem skapast hafði. Það gerði
hann frá þeim stað sem honum fannst réttast: úr prédikunarstólnum, þaðan
sem hann flutti Invocavit prédikanirnar.
Viðbrögð Lúthers
Invocavit prédikanirnar
Fyrsta prentaða útgáfa prédikananna ber titilinn:
Átta prédikanir eftir Dr. M. Luther, fluttar af honum á föstu í Wittenberg, þar sem
stuttlega er fjallað um messur, myndir, báðar myndir sakramentisins, [kjötjneyslu
og einkaskriftir o.s.frv.26
22 Tveggjaríkjakenning Lúthers býr hér greinilega að baki. Góða umfjöllun um hana er að
finna hjá Bernhard Lohse: Martin Luther’s Theology. Its Historical and Systematic
Development, þýð. Roy A. Harrisville, Fortress Press, Minneapolis 1999, 314-324.
23 WA Br 2, 455-456 (Bréf til Friðriks vitra 5. mars 1522). LW 48, 391.
24 WA Br 2, 456-457 (Bréf til Friðriks vitra 5. mars 1522). LW 48, 391-392. Keisari var um
þessar mundir mjög upptekinn af ýmsum málum, m.a. glímu við Frakklandskonung og
hafði því lítinn tíma til að sinna málefnum Lúthers. Bernhard Lohse: Martin Luther. An
Introduction to His Life and Work, þýð. Robert C. Schultz, T&T Clark, Edinburgh 1987,
2-3; Gerhard Brendler: Martin Luther. Theology and Revolution, þýð. Claude R. Foster,
Jr., Oxford University Press, New York & Oxford 1991, 191-192.
25 WA Br 2, 459-462 (Bréf til Friðriks vitra 7. eða 8. mars 1522). LW 48, 394-398.
26 WA 10 III, 1 (Yfirskrift yfir Invocavit prédikununum). LW 51, 69.
189