Ritið : tímarit Hugvísindastofnunar - 01.10.2020, Blaðsíða 143
SkÚLI SkÚLASON
148
Hugsunin styður við þá staðreynd að við lítum gjarnan á okkur sem
drottnara náttúrunnar, og fullyrða má að umgengni okkar í henni, nýting
náttúruauðlinda og viðleitni til að stjórna náttúrufyrirbærum – til dæmis
svokölluðum meindýrum (sérstaklega í landbúnaði) – ber þess skýr merki að
við trúum á vélrænar og einfaldar tæknilegar lausnir flókinna vistfræðilegra
verkefna. Þessar „lausnir“ hafa oftar en ekki valdið ómældum skaða, svo sem
ofveiði, útrýmingu stofna og tegunda, óafturkræfum vistkerfislegum breyt-
ingum, hruni vistkerfa og gríðarlegri mengun. Og það sem meira er, hugsun
okkar, samskipti, áætlanagerð og tungumál eru mörkuð af drottnunarsýn.
Þannig tölum við til dæmis gjarnan um mann og náttúru. Orðræðan í sam-
félaginu – og þar af leiðandi hugsunin, stefnuplögg, áætlanagerðir, lög,
reglugerðir og kennsluefni – mótast af ofangreindri sýn, sem lýsa má sem
þröngri mannhverfri afstöðu sem aðskilur mann og náttúru.21 Hér kemur
við sögu hinn huldi kraftur sem áður hefur verið nefndur; við eigum hrein-
lega erfitt með að tala og skrifa um þessi mál (þar með talið að benda á
vandann og aðrar leiðir til að skoða náttúruna) öðruvísi en að framsetningin,
orðin, hugtökin og setningarnar séu togaðar í átt að ríkjandi vél- og tví-
hyggju um mann og náttúru sem eru í orðsins fyllstu merkingu greypt inn
í hvert okkar, samfélagið og menninguna. Nú er hvorki rétt né sanngjarnt
að eigna Descartes alfarið að svona er komið, margt fleira mætti draga fram
sem varðar hugsunina, vísindabyltinguna, samfélagsgerðina, iðn- og tækni-
væðingu, valdakerfi þjóða, stjórnmálakenningar og svo framvegis, sem hefur
einkennt þróun mála eftir hans daga.22
Vélhyggja og siðferði
En hver er þessi siðferðilega hlið? Lítum fyrst á dæmi sem varðar dýr og
skýrir alvarleika vandans. Descartes sagði dýrin sálarlausar vélar, og þar af
leiðandi tilfinningalaus. Svona afstaða réttlætti meðal annars hrottafengna
meðhöndlun manna á öðrum dýrum, til dæmis í vísindalegum tilraunum.23
Helix. Gene, Organism and Environment, Cambridge MA: Harvard University Press,
2000.
21 Nú blasir við að afstaða manns er í eðli sínu háð því hver við erum, og ég legg því
áherslu á að í þessari ritgerð vísar notkun hugtaksins „mannhverfni“ til afstöðu sem
einkennist af þröngum sjónarmiðum og hagsmunum.
22 Eftirfarandi bók gerir það mjög vel: ársæll Már Arnarsson, Síðustu ár sálarinnar,
Reykjavík: Háskólaútgáfan, 2016.
23 Eftirfarandi grein gefur prýðilegt yfirlit á þessari sögu: Rita Leal Paixão og Fermin
Roland Schramm, „Ethics and animal experimentation: what is debated?“, Cad.
Saúde Pública 1999, bls. 99–110.