Ritið : tímarit Hugvísindastofnunar - 01.10.2020, Blaðsíða 276
Að ÞEKKJA SiNN ViTJuNARTÍMA
281
heilbrigð tengsl við konur heldur lítur á þær ýmist sem upphafnar madonn-
ur eða siðlausar hórur; því síður getur hann tengst föður sínum og af þeim
sökum getur hann ekki orðið fullmótaður karlmaður í skilningi freudískrar
sálgreiningar.62
Síðast en ekki síst passa kenningar Freuds um narsisma og göfgun vel
við Eftir örstuttan leik. Þótt Bubbi hafi ógeð á sjálfum sér snýst sú tilfinning
aðallega um kynferðislega fortíð hans; að öðru leyti er hann yfirgengilega
sjálfhverfur og flestar hans gerðir eru miðaðar við þarfir og langanir hans
sjálfs og einskis annars. Hann er því gott dæmi um narsista sem, eins og
Dagný bendir á, getur „í raun ekkert elskað, allra síst sjálfan sig og þar af
leiðandi ekki aðra“ þrátt fyrir sjálfhverfuna.63 Samkvæmt Freud er síðbúinn
narsismi ástand þar sem einstaklingur hefur ekki náð að vinna úr þeim frum-
læga narsisma eða sjálfsást sem einkennir alla einstaklinga í frumbernsku
heldur beinist líbídóið enn fyrst og fremst að einstaklingnum sjálfum – og
hans eigin kyni.64 Samkynhneigð er þannig síðbúinn narsismi, röskun á heil-
brigðum þroska sjálfsverunnar, og sjálfhverfa Bubba rennir stoðum undir
þá greiningu að einmitt þetta sé að hrjá hann. Þá ákvörðun Bubba að skrifa
bók má einnig skilja í ljósi þess sem Freud segir um göfgun (e. sublimation)
óæskilegra hvata en hugtakið á við það þegar slíkum hvötum er fundinn
farvegur sem samfélagið samþykkir.65 Í stað þess að leita til karlmanna eftir
kynferðislegri útrás skrifar Bubbi sína eigin sögu, sem þrátt fyrir að vera
nokkuð narsískt verkefni er engu að síður spor í átt til umbreytingar.
Sjá má ákveðin líkindi milli Bubba og Elíasar, til dæmis spjátrungsháttinn
sem einkennir Bubba og greina má á myndum af Elíasi frá þessum árum og
í lýsingum samtímamanna hans, auk þess sem hann birtist skýrt í Skáldu.66
Elías sveiflast, eins og fyrr var nefnt, milli vanmáttarkenndar og sjálfbirgings-
háttar og það sama gerir Bubbi; báðir eru þeir blanda af mönnunum tveimur
sem Elías lýsti í „Dægurhugleiðingum“ árið 1943. Báðir misstu móður sína
62 Dagný Kristjánsdóttir, „Sýnt en ekki gefið“, einkum bls. 116–117. Sjá einnig Ásta
Kristín Benediktsdóttir, Facing the Heartbeat of the World, bls. 167–173.
63 Dagný Kristjánsdóttir, „Sýnt en ekki gefið“, bls. 121.
64 Sigmund Freud, „um Narsisma. inngangur“, Ritgerðir, þýðandi Sigurjón Björnsson,
Reykjavík: Hið íslenzka bókmenntafélag, 2002, bls. 23–55.
65 um þetta má til dæmis lesa í ritgerð Freuds um Leonardo da Vinci en hann taldi
listsköpun da Vinci meðal annars gott dæmi um göfgun samkynhneigðra hvata:
Sigmund Freud, Leonardo da Vinci and a Memory of His Childhood, þýðandi Alan
Tyson, Harmondsworth: Penguin Books, 1963.
66 Þorsteinn Antonsson hefur til dæmis bent á ýmis líkindi Bubba og Elíasar: Þorsteinn
Antonsson, Þórðargleði, bls. 66–67.