Ritið : tímarit Hugvísindastofnunar - 01.10.2020, Blaðsíða 219
KRISTÍn LOFTSDóTTIR
224
lestarvagni. Dumoutier gat greint höfuðkúpu d’Urvilles frá öðrum fórnar-
lömbum vegna þekkingar sinnar og reynslu.91 Brjóstmynd d’Urvilles er til
sýnis í Musée de l‘Homme í París og þrátt fyrir að hún hafi ekki verið keypt
af Kanarísafninu er hún áhugaverð í samhenginu hér því hún endurspeglar
þessa fjölþættu merkingu brjóstmyndanna.
Margvíslegar leiðir voru notaðar til að bæta safn brjóstmyndanna og gera
það sem fjölbreytilegast. Sumar brjóstmyndir á Kanarísafninu eru gerðar
eftir einstaklingum sem af ýmsum ástæðum voru í París og samþykktu að láta
taka afsteypu af sér. Ein slík er af Osifekunde, Yoruba-manni frá suðurhluta
nígeríu. Osifekunde bjó í Ijebu-Ode rétt hjá Lagos og var líklega fæddur
1795. Þegar hann var um 20 ára og á viðskiptaferðalagi var hann tekinn til
fanga og seldur í þrældóm.92 Lovejoy segir að Ijaw-sjóræningjar frá óseyrum
niger-fljótsins (einnig hluti af núverandi nígeríu) hafi handsamað hann og
selt þrælasölum frá Brasilíu.93 Í Rio de Janeiro var hann keyptur af frönskum
manni og endurskírður Joaquim. Hann dvaldist í Brasilíu í 20 ár eða þar til
einhvern tímann á milli 1836 og 1838 þegar eigandi hans ákvað að ferðast til
Parísar og taka Joaquim með sér sem þjón sinn. Þrælahald var á þeim tíma
bannað í Frakklandi og því fékk Osifekunde í raun frelsi þegar hann kom
til Parísar. Í París lágu saman leiðir hans og Armand Avezac, varaforseta
Société Ethnologique í París. Avezac hafði mikinn áhuga á að fræðast betur
um siði og samfélag fólks á óseyrum niger. Avezac skráði niður almennar
upplýsingar um heimaslóðir Osifekunde sem og sögu hans og hefur vafalítið
haft einhverja milligöngu eða aðkomu að tilurð brjóstmyndarinnar þótt ég
hafi það ekki staðfest. Avezac segir í riti sínu að Osifekunde sé augljóslega af
göfugum uppruna. Hann útskýrir að margir „negrar“ – eins og hann orðar
það – leggi reyndar áherslu á einhverskonar göfugan uppruna, en nákvæm
og greinagóð þekking Osifekunde á stjórn og samfélagsskipan auki líkurnar
91 Kriselle Baker og Elizabeth Rankin, „In Search of the Present Fiona Pardington’s
Ahua“, Fiona Pardington. The Pressure of Sunlight Falling, ritstjórar Kriselle Baker
og Elizabeth Rankin, Dunedin, nýja Sjáland: Otago University Press, 2011, bls.
12–18, hér bls. 12.
92 Paul E. Lovejoy, „Civilian Casualties in the Context of the Trans-Atlantic Slave
Trade“, Civilians in Wartime Africa. From Slavery Days to Rwandan Genocide, ritstjóri
John Laband, Westport, Connecticut: Greenwood Press, 2007, bls. 17–50, hér bls.
32–33; Paul E. Lovejoy, „Scarification and the Loss of History in the African Di-
aspora“, Activating the Past. History and Memory in the Black Atlantic World, ritstjórar
Andrew Apter og Lauren Derby, newcastle upon Tyne, England: Cambridge
Scholar Publishing, 2010, bls. 99–138, hér bls. 105.
93 Paul E. Lovejoy, „Civilian Casualties in the Context of the Trans-Atlantic Slave
Trade“, bls. 17–50.