Ritið : tímarit Hugvísindastofnunar - 01.10.2020, Blaðsíða 211
KRISTÍn LOFTSDóTTIR
216
fólk á að láta taka afsteypu af höfði eða líkama sínum vegna þess að gjafir eða
greiðsla var í boði, en í öðrum hafði það lítið val og var jafnvel þvingað með
líkamlegu ofbeldi.57 Í enn öðrum tilfellum voru einstaklingar viljugir til þess
að taka þátt í því sem þeir litu á sem framþróun vísinda eins og sýnt verður
hér á eftir.
Í þessum hluta greinarinnar fjalla ég um brjóstmyndir á Kanarísafninu
og hvernig það kom til að sumar þeirra voru gerðar. Ég dreg þannig athygli
að nokkrum einstaklingum sem til er brjóstmynd af, en einnig þeim sem
bjuggu til brjóstmyndirnar, sem endurspeglar það samhengi sem þær voru
gerðar í. Eins og umræðan sýnir koma brjóstmyndirnar á Kanarísafninu úr
ólíkum áttum, sem og einstaklingarnir sem þær eru af. Forsendur fyrir vali
á hvaða brjóstmyndir voru keyptar eru ekki ljósar en þó má telja að mark-
miðið hafi verið að sýna það sem á þeim tíma voru taldir ólíkir kynþættir
enda safnkosturinn kynntur á þann hátt í umræðu um brjóstmyndirnar árið
1893.58 Á safninu eru ekki neinar upplýsingar aðrar en þær sem hafa verið
sýnilegar á litlu tréspjaldi á standi sem þær standa uppi á í sýningasalnum.59
Á þessu spjaldi er stundum nafn einstaklingsins, í öðrum tilfellum einfald-
lega nafn ættflokks eða landsvæðis. Listi safnsins í dag yfir brjóstmyndir í
eigu þess endurspeglar sömu upplýsingar. Þessi vöntun á upplýsingum um
einstaklingana gefur til kynna að fyrst og fremst var litið á þá sem fulltrúa
ákveðinna hópa eða kynþátta. Rannsókn mín á brjóstmyndasafninu hefur
því falið í sér greiningu á efni skjalasafnsins á Kanarísafninu, leit að upp-
lýsingum um brjóstmyndir almennt sem gerðar voru á þessum tíma, sem
og greiningu á safnkosti Musée de l’Homme í París í gegnum heimildir og
heimsóknir á safnið. Val mitt á brjóstmyndum til að fjalla um hér reynir að
draga fram úr hversu ólíkum áttum þær komu og þau fjölbreyttu tengsl sem
endurspeglast í söfnun þeirra. Um margar brjóstmyndanna hefur mér ekki
tekist að finna neinar upplýsingar.
Plaster Casts. Reviewing the History, Composition, and Scientific Value of the Ra-
ymond A. Dart Collection of African Life and Death Masks“, HOMO 68: 5/2017,
bls. 362–377, hér bls. 364–369.
57 Tobias M.R. Houlton og B.K. Billings, „Blood, Sweat and Plaster Casts“, bls. 362–
377.
58 Don Diego Ripoche y Torrens, Estudio de los bustos que posee este centro antropológico,
Las Palmas de Gran-Canaria, 1893.
59 Þetta hefur þó breyst ögn eftir að ég hóf rannsókn mína, en hún hefur aukið áhuga
safnsins á sögu þessara brjóstmynda. Í rannsóknarferð minni 2019 hafði safnið til
dæmis sett tvær brjóstmyndir á sýnilegri stað með ögn meiri upplýsingum.